"Save Ukraine" Ukrayina hayriye teşkilâtı işğal etilgen Qırımdan qırımtatar Emine ve eki qızını Ukrayinanıñ kontrolindeki topraqlarğa çıqarmağa yardım etti.
Çiçek ayınıñ 23-nde Instagramda Save Ukraine tesisçisi, Ukrayina prezidentiniñ bala aqları vekâletlisi Mıkola Kuleba bunı bildirdi.
"Er bir musulman — terroristtir". İşğal etilgen soñ Qırımda Emineniñ rus mektebine barmağa mecbur olğan büyük qızı bu sözni eşitken edi. Qız añlap olamadı, ve "ocalar"ğa sual berdi: "Ne içün biz öylemiz?" Amma cevaplarnı bala eşitmedi", — dep qayd etti o.
Kuleba qayd etti ki, 2014 senesi Rusiye işğali başlağanından berli qoranta basqığa oğradı: azan yasağı, ana tili dersleriniñ qısqartılması, daimiy qorquzuvlar.
Onıñ aytqanına köre, daa biñlernen qırımtatar yarımadada qala, er kün öz aqları içün qorqu ve basqığa rastkele.
Bundan evel Qırımtatar Milliy Meclisiniñ reisi Refat Çubarov Birleşken Milletler Teşkilâtınıñ tamır halqları meseleleri daimiy forumınıñ 25-inci sessiyasında Qırım işğali qırımtatarlarğa qarşı repressiyalar, yarımadanıñ arbiyleştirilüvi, topraq ve resurslarnıñ zapt etilüvi, ekologik bozuluvı ve yerli sakinlerniñ Rusiye Federatsiyasınıñ Silâlı quvetlerine mecburiy celp etilüvinen alâqalı olğanını bildirdi.
Hatırlatamız ki, işğal etilgen Qırımda Rusiye Ukrayinağa istilâsından soñ repressiyalar seviyesi bayağı arttı. Dört yıl içinde siyasiy mabüslerniñ sayısı 282 insanğa arttı, bu ise 2022 senesine qadar Kremlniñ Qırım mabüsleriniñ umumiy sayısından çoq, dep QRMniñ idarecisi Zarema Bariyeva bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
