Norvegiya Helsinki eyyetiniñ baş kâtibi Berit Lindemann, advokat mentorlığı teşebbüsi çerçivesinde Qırım siyasiy mabüsi Ruslan Süleymanovnıñ mentorı oldı.
Norvegiya Helsinki eyyeti bunı bildirdi.
Lindeman Sğleymanovnı doğğan kününen hayırlap, vaqtınca işğal etilgen Qırımda qırımtatarlar taqip etilgenini hatırlattı.
"Qırımda işkence, zorbalıqnen ğayıp etüv ve şübeli ölümler er künlik ayatnıñ bir parçası oldı. Rusiye Qırımnı işğal etken soñ, qırımtatarlar kene de, evelki nesilleri kibi, maqsat oldı", — dep Berit Lindeman tarif etti.
Onıñ qayd etkenine köre, Ruslan Süleymanov Rusiye akimiyeti tarafından qanunsız tutulğan 130-dan ziyade qırımtatardan biridir.
"Bugün Ruslan Süleymanovnıñ doğğan künü. Jurnalist ve faalci Rusiye rejimi tarafından qanunsız tutulğan 130-dan ziyade qırımtatardan biri ola. Ruslan 14 yıllıq apis cezasına mahküm etildi, onı şimdi Rusiye toprağında keçire", — dep Lindeman qoştı.
Lindeman onı azat etmege de çağırdı.
"Men onıñ acele azat etilmesini talap etem, böylece o, Qırımğa, qorantasına qayta ve müim işini devam ete bile", — dep Norvegiya Helsinki eyyetiniñ baş kâtibi qayd etti.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
