Berlin şeerinde, Çekpoynt Çarlideki Berlin divarı müzeyinde, qırımtatar siyasiy mabüsleriniñ balalarına bağışlanğan "Babalarını beklegende öseler" sergisi açıldı. Sergi, Rusiye tarafından uydurılğan qabaatlavlar esasında apiske alınğan yıllarnen ana-babasız ösken balalarnıñ ikâyelerini añlata.
Sergi çiçek ayınıñ 20-nde Zmina uquq qorçalayıcı teşkilâtı tarafından ilân etildi.
Sergi, siyasiy taqipler sebebinden ana-babasından ayırılğan Qırımdan 16 balanıñ ikâyelerini qayd ete. Fotoresimler, şahsiy eşyalar ve mektüpler, işğal, belli olmağan vaziyet ve devamlı telâş içinde öskenlerini köstere.
Sergi 2020 ve 2025 seneleri resimlerini ve balalarnıñ ana-babalarına yollağan mektüplerini birleştirdi. Bu fotoresimniñ bir qısmı Emine Cepparnıñ vaqtınca işğal etilgen Qırımda qırımtatarlarnıñ taqip etilmesine bağışlanğan "Özüne sadıqlıq — cinayet degildir" leyhasında taqdim etilgen edi.
Siyasiy mabüslerniñ qorantalarınıñ şahsiy eşyaları ayrı yer ala. Olarnıñ arasında Qırım siyasiy mabüsi Server Mustafaev oğluna yaptırğan ötmekten tespi de bar. Teşkilâtçılar böyle şeylerni, yıllarnen ayırılğan olsalar da, devam etken bağnıñ timsalleri dep adlandıralar.
Mektüplerde balalar ana-babalarına muracaat eteler. Qırım siyasiy mabüsi Emir-Usein Kukunıñ oğullarından biri böyle yazdı: "Babam... 10 yıldır apiste yatasıñ. Sensiz keçken yıllar pek qıyın edi... Sen er vaqıt dualarımda ve yüregimdesiñ".
Teşkilâtçılarnıñ malümatına köre, Qırım işğaliniñ on ekinci yılında 367 bala babasız qaldı, olardan 246-sı — çağına yetmegen balalar. Çoqusı balalarda ana-babalarınıñ tintüvleri ve apiske alınmaları ruhiy travma, nevroz, depressiya ve diger sağlıq meselelerine ketirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
