İşğalciler Qırımdaki gençlerni arbiyleştirmege devam eteler: mayısnıñ 1-nden başlap yarımada mekteplerinde başlanğıç arbiy azırlıq dersligi testlenecek.
"Agentstvo.Novosti" Rusiye resursı bunı bildirdi.
"Derslikni yazğanda müellifler, olarnıñ sözlerine köre, Ukrayinadaki cenkte "yañı usullar"nı toplay ediler. Kitap, müelliflerniñ fikirince, insanlarnıñ "aqiqiy ve uydurılğan dünyanı ayırmayıp, simulâtsiya vaziyetinde yaşağanı"nı köstergen "Matritsa" filmi aqqında ikâyenen başlana.
İşğal etilgen Qırımdan ğayrı, derslik Volgograd vilâyetinde de testlenecek. İlk küz ayından başlap, daa sekiz bölgede qullanılacaq.
Kitapnıñ yaratılmasında "Alfa" ve "Vimpel" gruppalarınıñ askerleri iştirak etti, müellifler balalarğa NATO telükesi ve "Ğarpnıñ cenkke ıntıluvı" aqqında tarif eteler.
"Derslikniñ müellifleri Rusiyeniñ milliy havfsızlıq strategiyasını tarif etip, "Rusiyeniñ menfaatlarına zıt kelgen er kes ya da er şey telükeli ola bile", dep yazalar. NATOnı derslikte "birdem Ğarpnıñ arbiy blokı" dep adlandıralar. Bundan da ğayrı, derslikniñ müellifleriniñ yazğanına köre, "Ğarpnıñ global ükümranlıqqa ıntıluvı bütün dünyada devlet avdarmaları ve cenklerniñ sebebi ola", — dep "Agentstvo.Novosti" yazdı.
Hatırlatamız ki, "Almenda" vatandaş maarifi merkeziniñ reisi Mariya Sulâlina bildirdi ki, işğal etilgen topraqlarda, hususan Qırımda, ukrayin balalarınıñ arbiyleştirilüvi — umumen Avropanıñ havfsızlıq meselesidir, çünki bu balalar kelecekte Rusiyeniñ dünyanıñ çeşit köşelerinde qullanması mümkün.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
