Yedi tahqiqat izolâtorı, şu cümleden işğal etilgen Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki) 8-nci SİZO, Rusiye Federal havfsızlıq hızmetiniñ nezareti altına keçti. 2026 senesi qara qış ayınıñ 1-den itibaren Rusiyede quvetçilerge öz SİZOlarına saip olmağa, olarnı tutmağa ve tutulğanlarnı konvoylarğa alıp ketmege izin berildi. Lâkin işğal etilgen Qırımnıñ paytahtındaki izolâtor aqqında malümatnı belli olmağan sebeplerden Rusiye sıñırladı.
The Insider Rusiye mediası, Rusiye Federatsiyası uquqiy şahıslar yekâne devlet cedvelinden (UŞYDC) malümatqa esaslanıp, bu aqqında yazdı.
"Simferopoldaki (Aqmescitteki — terciman) FSB SİZOnıñ (Rusiye FCHFederal cezalandıruv hızmetiniñ sabıq 8-nci SİZO) reberligi aqqında malümat gizlengen: UŞYDCdeki bu malümatqa irişim sıñırlanğan. Böyle bir imkân qanun tarafından belgilengen ve uquqiy şahısnıñ öz arizasına köre qullanıla — başqa izolâtorlarğa nisbeten bu kibi malümat açıq olıp qala. Daa evel cedvelde müessiseniñ yolbaşçısı olaraq Rauf İdrisov qayd etilgen edi", — dep haber vastaları yazdı.
İşğal etilgen Simferopoldaki (Aqmescitteki) 8-nci SİZO yolbaşçılığı ile bağlı şahsiy malümatnıñ gizli tutulması aqqında Rusiye advokatı Mkola Polozov bildirdi, o, işğal etilgen Qırımda siyasiy mabüsler, qırımtatarlar ve arbiy esirlerniñ davalarına diqqat ayırıp, Rusiyeden çıqıp ketti. O, rusiyelilerniñ böyle areketlerini taqip qorqu ile bağlay.
"Elbette, olar qorqalar ve añlaylar ki, Ukraiyna repressiyalarğa, insan aqlarınıñ bozuluvına, işğalci rejimge qol tutqanlarnı taqip etecek, ve bu malümatnı, bu insanlarğa tez ya da keç adalet kelir, dep qorqıp, mesüliyetke çekilmemek içün er alda saqlaylar", — dep Polozov ayttı.
İşğal etilgen Simferopoldaki (Aqmescitteki) 8-nci SİZO 2023 senesi Elevatornıy aralığı, 4-ünci ev adresi boyunca açıldı. Aynı bu adreste 2-nci SİZO qayd etilgen.
QUQGQırım uquq qorçalayıcı gruppasınıñ uquq qorçalayıcılarınıñ bildirgenine köre, 2-nci SİZOda esasen siyasiy mabüsler, combattantlar ve Ukrayina tarafdarı olğan vatandaşlar tutula, olarnı ya qabaatlavsız tutalar, ya da sahte davalar çerçivesinde "terrorizm", "diversiya" ve "casuslıq" maddeleri boyunca mahkeme eteler. Olarnıñ malümatına köre, müessise FSBniñ "qoruyıcılığı" altında çalışa edi.
Mıkola Polozov, FSB şimdi böyle müessiselerde iç bir çetel nezareti olmadan repressiv areketler yapa bilecegini ayttı.
"FSB repressiyalarnıñ qapalı devri operatorı ola. FSB hadimleri operativ-istihbarat areketlerini yapa bile, FSB taqiqatçıları davalarnı aça bile, insanlar FSB hadimleri nezaret etken apishanelerde nezaretsiz tutula. FSBniñ areket usullarını añlaymız - istenilgen neticelerge irişmek içün basqı, zorbalıq ve işkence qullanıla. Advokatlarnıñ kirişini sıñırlamaq içün de sebep ola bile", — dep Polozov añlattı.
Polozov qayd etkenine köre, Qırımda Rusiye işğalinden soñ, esir alınğan arbiy hızmetçiler ve vatandaşlarnı mahkeme qararı ya da qanuniy sebepsiz tutacaq gizli apishanelerniñ bütün sisteması işke tüşürildi. İşğal etilgen Simferopoldaki (Aqmescitte) 2-nc ve 8-nci SİZOları "qanunsız apis yerleriniñ kölge sisteması" edi.
"İşğal etilgen Qırımda eñ azından bir izolâtornıñ FSB içün qullanılması, menimce, vaziyetni kerginleştire. Çünki Qırımda FSB terrorizm ile bağlı "davalarnı" faal açtı, tahqiqat organları taqiqat ete, azaplarnı qullana. Bir çoq qırımtatar taqip etile ya da mahküm etile, qadınlar taqip etile. Evelleri zorbalıq ve adliyecilerniñ kirsetilmesi ile bağlı problemler bar edi, şimdi bunı eki, üç ya da beş qat arttırmaq mümkün", — dep advokat tüşüne.
2026 senesi saban ayında Rusiye FSBsiniñ nezaretine kirsetilgen daa altı SİZO Moskvada ("Lefortovo"), Sankt-Peterburg, Rostov-na-Donu, Krasnodar, Vladikavkaz, Çelâbinskte buluna. Şimdi bu müessiseler "FSB SİZOsı" ya da "FSB topraq idareleri" olaraq adlandırıldı.
The Insider hatırlata ki, tahqiqat izolâtorları 2005 senesine qadar FSBniñ nezaretinde edi. O vaqıt olarnı Avropa Şurasınıñ ricasınen Rusiye Federal cezalandıruv hızmetine berdiler.
Hatırlatamız ki, Ukrayina prezidentiniñ Qırım Muhtar Cumhuriyetindeki temsilciliginiñ malümatına köre, 2026 senesi işğalciler SİZOda yerlerniñ sayısını arttırmağa planlaştıralar. Ruslarnıñ malümatına köre, yarımadada tahqiqat izolâtorlarınıñ tolulığı 103%-ni teşkil ete. Rusiye akimiyeti 366 yerlik SİZO qurmağa ve eki basamaqta 1500 yerlik yañı izolâtor qurmağa planlaştıra, 20 kameralı müstemlekeni tamir etmege ve mabüslerni mecburiy işke celp etmek içün 85 dane istisal donatmasını satın almağa niyetlene.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
