2026 senesi işğalciler işğal etilgen Qırımdaki SİZOda yerlerniñ sayısını arttırmağa planlaştıralar. Şimdi, ruslarnıñ malümatına köre, yarımadadaki tahqiqat izolâtorlarınıñ tolulığı 103%ni teşkil ete. Rusiye akimiyeti 366 yerlik SİZO qurmağa ve eki basamaqta 1500 yerlik yañı izolâtor qurmağa, 20 kamera binasınen bir müstemlekeni rekonstruktsiya etmege ve mabüslerni mecburiy işke celp etmek içün 85 dane istisal cihazını satın almağa planlaştıra.
Ukrayina prezidentiniñ Qırımdaki temsilciligi bunı bildirdi.
İşğal etilgen Qırımda Rusiye akimiyeti 2026 senesinden başlap cezalandıruv obyektleriniñ qurucılığını başlamağa planlaştıra.
"RF ükümeti bu tedbirlerni yarımadadaki SİZOlarnıñ tolulığınıñ belgilengen seviyesini aşqanınen añlata (işğalcilerniñ aytqanarına köre, Qırımdaki SİZOlarnıñ tolulığı şimdi 103%-den ziyade ola). Programma 2035 senesine qadar çalışacaq ve Rusiye Federatsiyasınıñ bütün toprağında, şu cümleden Ukrayinanıñ vaqtınca işğal etilgen bölgelerinde, cezalandıruv obyektleriniñ qurucılığı ve rekonstruktsiyasını qaplaycaq, amma Qırımda qurucılıq 2026 senesinden 2030 senesine qadar planlaştırıla", — dep temsilcilik bildirdi.
2025 senesi arman ayınıñ 20-nde Rusiye ükümeti 1240-ncı qararnı qabul etip, "Cinaiy-icra sistemasınıñ inkişafı (2018-2035 seneleri) " federal maqsat programmasınıñ deñişmelerini tasdıqladı. Vesiqada işğal etilgen Qırımda cezalandıruv astyapısınıñ keñişletilmesi aqqında aytıla.
"Ukrayina Prezidentiniñ Qırım Muhtar Cumhuriyetindeki Temsilciligi Rusiye Federatsiyasınıñ işğal etilgen Ukrayina topraqlarında qanunsız areketlerini takbih ete. Yañı apishanelerniñ qurulması halqara gumanitar uquqnı ve işğalci devletke işğal etilgen topraqlarnıñ ealisine qarşı repressiyalarnı quvetleştirgen şekilde astyapını ve qanunlarnı deñiştirmege yasaq etken Dörtünci Jeneva şartnamesini boza", — dep temsilcilik qayd etti.
Prezidentniñ temsilciligi añlattı ki, böyle planlarnı Rusiye RFnıñ repressiv siyaseti quvetleşkeninen ve 2025 senesi arman ayınıñ 25-nde işkence ve diger zalım, insaniyetsiz ya da şerefini aşalağan areket ve cezalavlarğa qarşı Avropa şartnamesinden çıqqanınen amelge keçire.
"Bu qarar mabüslerni tutuv şaraitiniñ halqara nezaretinden qaçınmaq ıntıluvını köstere ve işğal etilgen Qırımda insan aqları içün telükelerni arttıra. Temsilcilik halqara toplulıqnı Rusiyege qarşı siyasiy ve sanktsiyalar basqısını quvetleştirmege çağıra, böyleliknen vaqtınca işğal etilgen Ukrayina topraqlarında insan aqlarınıñ bozuluvı ve qanunsız faaliyetni toqtatmaq mümkün olur", — dep temsilcilikniñ beyanatında qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
