Rusiyeniñ ABINSK quru yük gemisi (IMO: 9303869) 21 kün devamında, saban ayınıñ 23-nden çiçek ayınıñ 12-ne qadar, çalışmayıp, İsrail limanına kirdi. Jurnalistlerniñ malümatına köre, gemide işğal etilgen Ukrayina topraqlarından hırsızlanğan 43 biñ tonnadan ziyade boğday bar.
"Barıştırıcı" Merkeziniñ SeaKrime leyhasınıñ jurnalisti Katerına Yaresko Facebookta bu aqqında yazdı.
"ABINSK (IMO: 9303869) 43765,18 tonna işğal etilgen Ukrayina topraqlarından kelgen boğday yükünen Hayfada (İsrail) qabul etildi. Gemi "Kavkaz" limanınıñ demirge qoyulğan noqtasında yüklendi, yük işğal etilgen ukrayin limanlarından ketirildi. ABINSK saban ayınıñ 23-nden berli İsrailden izin bekley edi, ve bugün (2026 senesi çiçek ayınıñ 12-nde — muar.) onı aldı", — dep Yaresko yazdı.
Açıq menbalardan alınğan malümatqa köre, Rusiye ABINSK quru yük gemisi işğal etilgen Keriçte qayd etildi ve limanından 2026 senesi saban ayınıñ 17-nde çıqtı. 2026 senesi çiçek ayınıñ 12-nde o, Hayfa limanında qabul etildi.
Hatırlatamız ki, Tış istihbarat hızmetiniñ malümatına köre, Rusiye Federatsiyası vaqtınca işğal etilgen Ukrayina topraqlarında yetişken ububat mahsulatını muntazam sürette çıqara ve olarnı tış bazarlarda Rusiye ihracatı adı altında sata. Bu maqsatnen Rusiye işğal etilgen Azaq ve Qara deñiz limanlarınıñ, hususan Sevastopol (Aqyar) deñiz limanınıñ astyapısını qullana. 2025 senesi devamında Ukrayina VİETdan 2 million tonnadan ziyade ububat mahsulatı çıqarıldı. Esas miqdarı ise, yılnıñ ekinci yarısında — tahminen 1,4 million tonna oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
