Rusiye Federatsiyası Ukrayinanıñ vaqtınca işğal etilgen topraqlarında yetişken aşayt mahsulatını muntazam sürette çıqara ve olarnı Rusiye ihracatı adı altında tış bazarlarda sata. Bu maqsatnen RF Azaq ve Qara deñizlerniñ işğal etilgen limanlarınıñ, hususan Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) deñiz limanınıñ astyapısını qullana.
Ukrayina tış istihbarat hızmeti bu aqqında bildirdi.
UTİH malümatına köre, 2025 senesi devamında Ukrayina VİET-dan 2 million tonnadan ziyade aşayt mahsulatı çıqarıldı. Esas miqdarı ise, yılnıñ ekinci yarısında — tahminen 1,4 million tonna oldı.
Aynı zamanda Rusiye, qanunsız sürgün etilgen köy hocalığı mahsulatınıñ satıluv coğrafiyasını keñişlete. Şu cümleden, yollanmalarnıñ 53,6% Mısırğa (490 biñ tonna) ve Bangladeşke (250 biñ tonna) yollanıldı. Livanğa 78,1 biñ tonna ve Türkiyege 96,7 biñ tonna mal ketirildi. Bundan ğayrı, Suriyege 94,4 biñ tonna aşlıq ihracatı ğayrıdan tiklendi.
Ukrayina istihbaratı agroproduktlarnıñ Djıbut, Saudiy Arabistan ve Vyetnamğa ketirilgenini qayd ete.
Rusiye halqara sanktsiyalardan qaçınmaq içün "ship-to-ship" shemasını qullana — Qavqaz limanınıñ reyd keçirici rayonında gemiden gemige aşayt mallarınıñ yüklenüvi. İstihbaratta, böyle mehanizm, aşnıñ kerçek peyda oluvını gizlemege, vaqtınca işğal etilgen Ukrayina topraqları limanlarında tedbirlerden qaçınmağa ve qanunsız ticaret qabaatlavlarınıñ telükelerini azlaştırmağa imkân bere, dep qoştılar. UTİH malümatına köre, Rusiye bu shemni Saudiy Arabistan, Bangladeş ve Vyetnamğa ketirgende faal qullana.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
