İşğal etilgen Qırımda Yalta deñiz limanı yerinde oyun alanı qurulmağa başladı. Binanıñ etrafında qurucılıq alanı quruldı. Bu işniñ artında Rusiye diktatorı Vladimir Putinniñ yaqın safdaşı, milliarder Arkadiy Rotenberg tura.
Çiçek ayınıñ 12-nde Ukrayina Silâlı quvetleriniñ Mahsus operatsiyalar quvetleri (MSQ) tarafından teşkil etilgen MMM bu aqqında bildirdi.
Olarnıñ malümatına köre, Rusiye akimiyeti planlaştırğanı kibi, yolcu terminalınıñ yerinde kazino, musafirhaneler, şifahane ve eglence infrastrukturaları olacaq. Aynı zamanda yerli sakinler qurucılıqqa qarşı çıqtı — olar deñiz vokzalı ve yolcu naqliyatınıñ işini ğayrıdan tiklemege talap ettiler.
MMMde qayd etkenleri kibi, Kaciveli köyünde oyun alanını meydanğa ketirmek ğayesi 2019 senesi peyda oldı. Esas yatırımcı — Rotenberg tögereginen bağlı olğan ve evelki leyhalar içün infrastruktur leyhalarını idare etken şirket.
2024 senesi oraq ayında Devlet duması ve Federatsiya Şurası qanunı ile alan Yalta deñiz limanına avuştırıldı. Tezden işğalci akimiyet onı satıluvğa çıqardı. Onı Moskvanıñ "Qara deñiz inkişafı" şirketi satın aldı, onı MMMde taptılar.
"Yalta mülkiyetiniñ sürgün etilüvi aqqında evel yazğan edik. Bu ikâyede işğal etilgen topraqnıñ strategik aktivleriniñ Kreml elitasına yaqın olğan qurulışlar faydasına ğayrıdan taqsimlenmesi devam ete", — dep MMMde qayd ettiler.
Çiçek ayınıñ 11-nde "Qırım veter" Telegram-kanalı yerli cemaat binalarından limandaki binalarnıñ söküvi aqqında video yayınladı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
