Eñ azından beş qanunsız sürette mahküm etilgen qırımlı siyasiy mabüsler Volodımır Yakimenko, Oleksandr Jukov, Aleksey Tomashev, Rustem Murasov ve Yevğen Melniçuk Rusiyeniñ Saratov vilâyetindeki Puğaçov şeerinde №4 apishanede tutuldı.
Çiçek ayınıñ 10-nda Facebook saifesinde Qırımtatar resurs merkeziniñ reisi Eskender Bariyev bu aqqında bildirdi.
Onıñ malümatına köre, koloniya memuriyeti muntazam sürette izolâtsiya usullarını qullana, maneviy basqı yapa ve dayanılmaz tutuv şaraitlerini yarata. Böylece, Rustem Murasov, ŞİZOda bulunğanı içün 10 kg azlaştı, anda suvuq, sanitarsızlıq, kameralarda kemirgenler, kommunikatsiyalarnıñ fevqulâde vaziyeti ve tibbiy yardım yoq.
"ŞİZOda bulunması sebebinden o, tuvğanlarından haber alma imkânından marum qaldı. Bundan ğayrı, onıñ sağlıq problemleri bar, basım köterilip, baş ağrısı devam ete, amma tibbiy yardım kösterilmey", — dep Bariyev qayd etti.
Onıñ aytqanına köre, işğalci mahkemesi tarafından "narkotik taşuvı" içün 15 yıl ve 6 ayğa mahküm etilgen Volodımır Yakimenko aylar devamında ceza izolâtorında tutula. O, suvuq yerde, doğru urba ve ayaqqapsız, az aşnen ve tuvğanlarından haber almağan alda yatmağa mecbur.
Bariyev qayd etti ki, koloniya memuriyeti onıñ izolâtor müddetini sebepsiz uzatmaqta, bu ise, kerekli tibbiy yardım kösterilmegeni sebebinden sağlığınıñ fenalaşmasına ketire.
Onıñ aytqanına köre, "casuslıq" içün 12 yılğa mahküm etilgen 38 yaşındaki Oleksandr Jukovnı da koloniya memuriyetiniñ qararı ile ŞİZOğa yolladılar. Aqyar (SevastopolRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ) işğalci mahkemesi tarafından 14 yıl sert rejimli koloniyada qalmasına üküm etilgen Belarus vatandaşı Oleksiy Tomaşev de Puğaçovdaki №4 koloniyada cezasını çekip, basqı ve tecritke oğray.
"Al-azırda eki siyasiy mabüs de doğğan evinden biñlernen kilometr uzaqta, Saratov vilâyetinde №4 Rusiye Federatsiyasınıñ SİZO-sınıñ tüzetüv koloniyasında yapmağan cinayetleri içün qanunsız apis cezasını çekeler", — dep QRM reisi bildirdi.
İşğalciler tarafından "casuslıq" içün 17 yılğa üküm etilgen Aqyar (Sevastopol) sakini Yevğen Melniçuk da bir qaç afta devamında ŞİZOda tutuldı.
Uquq qorçalayıcı qayd etti ki, onıñ taqip etilüvi açıqtan-açıq Ukrayina tarafdarı olğanınen bağlı, koloniyadaki diger ukrain siyasiy mabüslerge yardım etkeni içün ŞİZOğa tüşti.
Bariyevniñ qayd etkenine köre, böyle areketler deşetli ve insaniyetsiz sayıla bile. O, halqara toplulıqnı işğal etken devletke qanunsız tutulğan bütün qırımlı siyasiy mabüslerni acele azat etmesi içün basqı quvetleştirmesine çağırdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
