İşğal etilgen Qırımnıñ Feodosiya (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ) şeerinde "Deñiz neft terminalı" şirketiniñ toprağında üç künden berli yanğın devam ete. O, Ukrayina Silâlı quvetleriniñ Baş ştabınıñ tasdıqlağanı çeçek ayınıñ 8-de gece ukrayin ücüminden soñ çıqtı.
Çeçek ayınıñ 10-nda NASA FIRMS hızmetiniñ uydu malümatları bunı kösterdi, olarnı Suspilne Qırım muarririyeti tedqiq etti.
Uydu köstergeni kibi, üç kün devamında yanğın şiddetligi biraz eksildi, amma alâ daa qayd etile.
Hatırlatamız ki, işğal etilgen Qırımnıñ Feodosiya (Kefe) şeerinde çeçek ayınıñ 8-de gece uçucısız uçaq aletleriniñ ücüminden soñ neft bazasında yanğın çıqtı. Yerli işğalli akimiyet bir qaç soqaqnı maşnalar içün blok etkenini bildirdi. Aynı vaqıtta Rusiye Mudafaa nazirligi yarımada üzerinde dronlarnı urğanını bildirdi.
Çeçek ayınıñ 8-nde işğal etilgen Qırımda Feodosiyada (Kefede) "Deñiz neft terminalı" ATnıñ zarar körgenini USQniñ komandanı Robert ("Madâr") Brovdi bildirdi.
Ukrayina Silâlı quvetleriniñ Baş ştabı çeçek ayınıñ 8-nde Kefede, ücümden soñ yanğın çıqqan yerlerde ve Ğvardiyske köyünde olğan yanğınnı tasdıqladı. Bundan ğayrı, ukrayin arbiy hızmetçileri Novoozerne rayonındaki radioelektron keşfiyat stantsiyasına ve Sofiyivka civarındaki "Bastion" yalı raketa kompleksiniñ mevam rayonına ücüm etti.
Evel Baş ştab, Qırımdaki "Deñiz neft terminalı" ATnıñ "Qırım yarımadası ve vaqtınca işğal etilgen Ukrayina cenübiy topraqlarına deñiz yolunen yaqarlıq ve yağ malzemeleriniñ teminlatı içün esas noqta olğanı"nı bildirdi.
Bundan ğayrı, "Exilenova+" ukrayin nezaret Telegram kanalı, evelki uçucısız uçaq aletleriniñ ücümlerinden soñ Feodosiyadaki (Kefedeki) neft bazasınıñ vaziyetini kösterdi. O qayd etti ki, obyektte "Pantsir" zenit raketa-top kompleksi ya da onıñ ücümlerni qaytarmaq içün maketi yerleştirilgen.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
