Krasnodar ülkesi mahkemesi Rusiye ve Ukrayina vatandaşlığına saip olğan Qırım sakinini "devlet hainligi"nde qabaatlanıp, mahküm etildi.
Krasnodar ülkesi mahkemeleriniñ matbuat hızmetine atfı etip, TASS Rusiye haber agentligi bunı bildirdi.
Rusiye tarafınıñ malümatına köre, adamnı "Rusiye Federatsiyasınıñ telükesizligine qarşı areketlerde çetel devletiniñ vekiline yardım etüv"de qabaatladılar.
"Mahsus donatmalarnı qullanıp, o, mahsus hızmetler hadimleriniñ, em de Krasnodar ülkesinde yerleşken strategik müessiseniñ qoruv hadimleriniñ radio yayınlarınıñ audioyazmalarını toplap, Ukrayina istihbaratınıñ vekiline bere edi", — dep haberde qayd etildi.
Mahkeme onı sert rejimli müstemlekede 17 yılğa ve bir yıl azatlıqtan marum etilmesine üküm etti.
Bundan ğayrı, mahkeme mahküm etilgen adamnıñ "öz faaliyeti neticesinde alğan" 569 204 rubleni (318 079 ğrıvnânı) devletke musadere etmege qarar aldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
