Çeçek ayınıñ 10, 11 ve 12-nde işğal etilgen Qırımnıñ yayla ve dağ ögündeki rayonlarda -2° qadar suvuqlıq beklenile.
Çeçek ayınıñ 8-nde işğalli Qırım FVN öz Telegram kanalında bunı bildirdi.
"Nazirlik" sakinlerge ösümliklerni buzlardan qorumağa, dağ ve ormanlarğa uzun yürüşlerden vazgeçmege, aydavcılarğa yollarda diqqatlı olmağa, tez yürmemege ve yol qaidelerine riayet etmege tevsiye ete.
Bundan da ğayrı, çeçek ayınıñ 9-nda saba Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad da) boranlı yağmur yağdı. Şaatlar bu tabiat adiseleriniñ videosını "Sevastopol naqliyatı" yerli Telegram kanalında derc ettiler.
Hatırlatamız ki, çeçek ayınıñ 5-nde aqşam Qara deñizde, Rusiyeniñ Novorossiysk şeerinden yaqın, işğal etilgen Qırımdan 150 km uzaqlıqta, 4.2 magnitudalı zelzele oldı. Milliy seysmik közetüv sistemasınıñ Mahsus nezaret merkeziniñ malümatı bunı kösterdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
