2015 senesinden 2025 senesine qadar işğalli Rusiye akimiyeti Qırımda 26,4 mlrd ruble (14,4 mlrd ğrıvnâ) miqdarında 120-den ziyade Ukrayina devlet mülkiyetini qanunsız şekilde "şahsiyleştirdi".
Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
Olarnıñ malümatına köre, "şahsiyleştirüv" cedveline maşna qurucılığı, şarap işhanesi, şifahane-kurort müessiseleri, em de neft ve liman astyapıları kirdi.
Qayd etilgenine köre, bu siyaset Rusiye kontrolindeki organlar tarafından tasdıqlanğan er yıllıq "şahsiyleştirüv planları" vastasınen amelge keçirile edi. Bundan da ğayrı, işğal etilgen Qırım toprağında küçük ve orta bizneske açıq auktsionlar keçirilmeden kirağa alınğan obyektlerni satın almağa imkân bergen Rusiye qanunları tatbiq etildi.
2015-2019 seneleri devamında "şahsiyleştirüv" yavaş-yavaş kenişletildi — küçük obyektlerniñ satıluvından başlap, büyük müessiselerniñ satıluvına qadar. Hususan, bu vaqıt devamında Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ), Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ) ve Yaltada bitirilmegen qurucılıq obyektleri ve ticariy mülkniñ mülkiyetsizleştirüvi keçe edi.
Eñ belli misaller arasında — 2017 senesi Sudaqtaki "Yañı Dünya" şampan şarapları zavodınıñ satılması. 1878 senesi qurulğan şirket, medeniy asabalıq statusına maliktir ve tarihiy şarap azbarları ve yüzüm bağlarınen belli. Bu devirde şifahane, turistik kompleksler ve diger obyektler de "şahsiyleştirildi". İşğalli akimiyetniñ bu kibi satıluvlardan umumiy kârı 6,88 mlrd ruble (3,76 mlrd ğrıvnâ) teşkil etti.
2020-2025 seneleri işğalli memuriyet mülkni yañı berüv mehanizmlerini qullanmağa başladı, hususan devlet aktivleriniñ kontrol etilgen şirketlerniñ nizamnamede qayd etilgen sermiyasına kirsetilüvi. Ukrayina tarafınıñ tahminlerine köre, bu, resmiy satıluv protseduralarına riayet etmeden, Ukrayina devlet mülkiyetini Rusiye kontrolindeki qurulışlarnıñ şahsiy mülkiyetine keçirmege imkân bere edi.
Bu devirde eñ büyük añlaşma 2020 senesi "Masandra" şarap zavodınıñ 5,3 mlrd rublelik (3,1 mlrd ğrıvnâlıq) ziyade satılması oldı. Bu Ukrayinanıñ eñ eski şarap işhanelerinden biridir, onıñ büyük yüzüm bağları ve tarihiy şaraplarnıñ unikal kollektsiyası bar.
Ayrı qayd etile ki, Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) Rusiye Federatsiyasınıñ işğalli idare sistemasında ayrı bir memuriy birlem olaraq çalışa. O yerde eñ büyük añlaşma, 1961 senesi qurulğan bölgeniñ eñ büyük şarap zavodlarından biri olğan İnkerman marka şarapları zavodınıñ 2023 senesi satılması oldı.
"Qanunsız "şahsiyleştirüv" Qırımda endi 10 yıldan ziyade devam ete ve sistemalı, maqsatlı bir tarzda keçe. Paralar yerli sakinlerniñ yaşayışını eyileştirmek içün degil de, qısmen işğalli qurulışlarnıñ bücetinde "qıtlıq"nı qapatmaq içün sarf etile. Böyleliknen, işğal etilgen ukrayin topraqlarınıñ yoq etilmesi sayesinde para qazanmaq mehanizmine çevirile", — dep Ukrayina prezidentiniñ Qırım Muhtar Cumhuriyetindeki temsilciligi qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
