Şimdi Kıyiv vilâyetiniñ İrpin şeerinde yaşağan Simferopoldan (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ten) 18 yaşındaki ukrayinalı şair ve yazıcı Boğdan-Lübomır Prıtula, 2026 senesi genç yazıcılar içün Oles Ğonçar adına Halqara alman-ukrayin edebiyat mukâfatınıñ laureatı oldı.
Ukrayina milliy edebiyat müzeyi bunı bildirdi.
Prıtula "Kiçik nesir" namzetliginde "Qafamnıñ iç tarafında toznen yazılğan qaydlar" cıyıntığı içün ğalebe qazandı.
Onıñ babası Volodımır Prıtula Suspilne Qırımına, bu Boğdan-Lübomırnıñ bu yılki ekinci prestijli edebiyat mukâfatı olğanını ayttı. 18 yaşını toldurğan künü, o, 2025 senesi basılğan "Oskolkı''Parçalar''" debüt şiiriy cıyıntığı içün Vasıl Sımonenk adına Bütünukrayin edebiyat mukâfatınıñ eñ genç laureatı oldı. Pritula ilk cıyıntığını 15-16 yaşında yazdı.
"İcadiyetiniñ sebebi, İrpin oğrunda uruşlar devam etkende ve o, evini terk etip, Rusiye ateşinden qaçqanda, tolu miyqaslı cenkniñ başlanması oldı. Birinci kere o, 2014 senesi tuvğan Qırımını terk etmege mecbur olğanda, Rusiye yarımadanı işğal etken soñ, evini coydı", — dep Volodımır Prıtula qayd etti.
Şimdi genç şair Kıyiv-Moğıla akademiyasında "Felsefe" mahsuslığı boyunca oquy ve prezident stipendiyasını ala.
Bundan da ğayrı, "Büyük nesir" nominatsiyasında mukâfatnı Lvivli Ostap Kudlatıy "Monarhiyanıñ şavlesi" romanınen aldı. "Şiiriyet" nominatsiyasında Andriy Fedorışın (Kıyiv) "Zülmet örtüsi" cıyıntığınen ve Yuliya Ğupalük (Antratsit) "Soñundan ekinci balıq"nen qayd etildi.
"Publitsistika" nominatsiyasında "Qırılmağan ve teslim olmağan" kitabı içün Mıkolayivden müellif Alina Titova ğalebe qazandı. "Oles Ğançarnıñ icadına bağışlanğan edebiyatşınaslıq eseri" nominatsiyasında Vinnıtsâ vilâyetiniñ Vapnârkı şeerinden kelgen Alöna Voytovıç Ğonçarnıñ icadını tedqiq etkeni içün ğalebe qazandı.
Oles Ğonçar adına mukâfat aqqında ne bilemiz
1996 senesi alman metsenatları Tetâna Kuştevska ve Diter Karrenberg tarafından Ukrayina yazıcıları milliy birliginen beraber tesis etilgen mukâfat, 30 yaşına qadar genç müelliflerge destek köstermek içün teşkil etildi.
O, "Büyük nesir", "Kiçik nesir", "Şiiriyet", "Publitsistika" ve "Oles Ğonçar aqqında edebiyatşınaslıq eseri" namzetliklerini qaplap ala. Yarışqa ukrayin tilinde neşir etilgen ve neşir etilmegen eserler qabul etile.
Dmıtro Çıstâk yolbaşçılığında belli yazıcı ve medeniyet erbaplarından ibaret olğan jüri eñ istidatlı iştirakçilerni bir ağızdan belgiley.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
