İşğal etilgen Qırım ve Herson vilâyetinden, em de Rusiyeniñ Moskva, Penza ve Tver şeerlerinden 120 mektep talebesi Bağçasarayda 10 künlik arbiy oquv yurtunı keçe.
"Qırım 24" telekanalı bu aqqında bildire.
İşğal etilgen Qırımda "Qırım furtunası" talimleri vaqtında bala ve gençlerniñ qanunsız arbiyleştirüvi 10 kün devam ete — saban ayınıñ 27-nden başlap ve yarın, çiçel ayınıñ 5-nde bitecek. Tedbirlerde iştirak etkenlerniñ arasında, telekanalnıñ intervyüsına köre, 10 yaşından başlap balalar bar.
İşğalcilerniñ nezareti altında balalar ve gençler taktik tibbiyet, ateş, dron idare etüv, yüksek dağ ve paraşüt idare etüv, "bağça" tipindeki naqliyat vastalarını idare etüv, em de diver ve mahsus beden azırlığı derslerinden keçeler.
"Bundan ğayrı, programma OMON bölükleri, istihbarat gruppaları ve uçurılmağan ordular içün mahsus kadrlar azırlav kurslarını belgiledi. İştirakçiler er kün iç işler nazirligi, FSB, Taqiqat komiteti ve diger quvet strukturalarınıñ vekillerinen körüşken proforeyentatsiyalı derslerge barğanlar", — dep videoda aytıla.
"Yunarmiya" Qırım bölüginiñ yolbaşçısı Sergiy Gavrilçuk jurnalistlerge bergen izaatında, rusiyeliler bu kibi tedbirler vaqtında kelecekte Rusiye ordusına askerlikke çağıruvlarnı azırlaylar, dep bildirdi.
"Rusiye gençleriniñ taktik talimler mektebi kelecek askerlerni azırlamağa ve arbiy-vatanperver terbiyeni inkişaf ettirmege doğrultılğan", — o dedi.
Sergiy Gavrilçukqa qarşı Ukrayina telükesizlik hızmeti 438-inci maddesiniñ 1-inci qısmı (cenk qanunları ve adetleriniñ bozuluvı) ve 436-2-inci maddesiniñ 3-ünci qısmı (Rusiye Federatsiyasınıñ Ukrayinağa qarşı silâlı tecavuzınıñ aqlanması, qanuniy olaraq tanılması, red etilmesi, iştirakçileriniñ şereflenmesi) boyunca deliller topladı. Ukrayina, Avropa Birligi ve İsviçre oña qarşı şahsiy sanktsiyalar kirsetti.
"Putinniñ vaqtınca işğal etilgen Ukrayina topraqlarından ukrain balalarınıñ sürgün etilmesine dair siyasetini destekley ve amelge keçire. Ukrayinanıñ vaqtınca işğal etilgen topraqlarından Rusiye Federatsiyasına ve Ukrayinağa "sağlıq, raatlıq ve oquv" adı altında ukrayin balalarınıñ kütleviy hırsızlanması, qanunsız sürgün etilmesi ve mecburiy köçürüvi mehanizminde iştirak ete, vaqtınca işğal etilgen Ukrayina topraqlarından balalarnıñ Rusiye Federatsiyasınıñ yekâne medeniy-tasil alanına ve vatandaş-vatanperver terbiyesi sistemasına "integratsiyasına" yardım ete, bu da işğal etilgen Qırımda balalarnıñ saqlanuvı ve askeriyleştirilüvine doğrultılğan tedbirler keçirüvinen bağlı", — dep Sergiy Gavriçuk aqqında Bİİ saytında aytıla.
"Yunarmiya" arbiy areketi 2016 senesi Rusiyede meydanğa ketirilgen edi ve soñra vaqtınca işğal etilgen Ukrayina topraqlarına, hususan Qırımğa, Donetsk, Luğansk, Zaporijjâ ve Herson vilâyetlerine tarqalğan edi.
Kiçik aynıñ 6-nda Baş prokurornıñ ofisiniñ bildirgenine köre, Donetskta uquq qoruyıcılar, 2019 senesinden 2025 senesine qadar 6 yaşından 18 yaşına qadar tahminen 6 biñ ukrayin balasını celp etken "Yunarmiya" Rusiye areketiniñ territorial ştablarınıñ yolbaşçılarını tapıp, olarğa şübhe bildirgenler.
Qırım Cumhuriyetiniñ Baş prokuraturası bölüginiñ prokurorı Mihail Statsenkonıñ aytqanına köre, olarnı ğıyabiy şekilde mahkeme etecekler.
"Delillerni toplamaqta bazı qıyınlıqlar bar, çünki şaatlarğa, bu balalarğa, arbiyleştirüvge irişmege imkânımız yoq. Aynı zamanda, İnternette bir çoq video, fotoresimler, olarnıñ çıqışları bar, olardan bu şahıslar kerçekten de böyle cinayetlerni teşkil etkenlerine inana bilemiz", — o dedi.
Prokurornıñ aytqanına köre, böyle azırlıq körgen balalar Rusiye silâlı quvetlerine qoşuldı ve Ukrayinağa qarşı cenk areketlerinde iştirak etti.
"Ebet, olarda Rusiye Federatsiyasında vatanperver areketiniñ inkişaf strategiyası bar, onıñ esasında "Yunarmiya" talebeleriniñ eñ az 10% ileride Rusiye Federatsiyasınıñ silâlı quvetlerine qoşulmalı. Bu em propaganda, em inandırma, em de maddiy istek, ve biz balalar kerçekten de büyük olğan ve Rusiye Federatsiyasınıñ Silâlı quvetlerine kirgen ve duşman tarafında cenk areketlerinde iştirak etken bir sıra adiselerni qayd ettik", — Mihail Statsenko dey.
Şübhelenilgenler teşkil etilgen gruppa terkibinde arbiy cinayet işlegenleri içün mahkeme etilecek (Ukrayina Ceza kodeksiniñ 28-inci maddesiniñ 3-ünci qısmı, 438-inci maddesiniñ 1-inci qısmı). Olarğa 12 yılğa qadar apis cezası berile bile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
