Baş istihbarat idaresi qanunsız qazma işlerinen oğraşqan ve işğal etilgen Qırımdan medeniy eserlerni alıp ketken rusiye arheologları ve teşkilâtlarnıñ bilgilerini yayınladı. Cedvelde kurganlar ve nekropollardan hırsızlanğan artefaktlar ve ukrayin mirasını satmağa yardım etken insanlar bar.
Çeçek ayınıñ 1-nde Ukrayina Mudafaa nazirliginiñ Baş istihbarat idaresi (UMNniñ Bİİ) öz saytında bu aqqında haber berdi.
İşğal etilgen Qırımda qanunsız qazmalar yapqan arheologlar arasında Bİİniñ cedveline ekspeditsiyalarğa, Donetsk vilâyetiniñ vaqtınca işğal etilgen toprağında qanunsız arheologik qazmalarğa yolbaşçılıq yapqan ve 2025-2026 seneleri ise Rusiye Medeniyet nazirliginden Qırım toprağında arheologik qazama işlerine izin alğan Eduard Kravçenko kirsetildi.
Bİİ Qırımdan bir sıra şeylerni hırsızlanğan eserler cedveline de qoştı. Böyleliknen, arbiy istihbaratqa köre, 2017 senesi ruslar ''Gospitalnıy'' kurğanından atlılar ve oqçular tasvirlengen taş, IV-V a. batal sabasınen taş, gemiler taşını alıp kettiler. Qanunsız qazılmalar 2017 senesi saban ayından arman ayına qadar devam etti.
2023 senesi Keriç rayonındaki "Qız-Aul Nekropolı"ndan ruslar özlerine II-III asırnıñ baqır pintseti, 599 senesi Bosporus devri stateri, II-III asır baqır bilezik, II-III a. sarı madenden eki amayılcılıq, içeri ğayıp olğan II-III a. baqır yüzük, II-III a. maden quşaq iligi, I-III a. sarı madenden yapılğan küpürçekni aldılar. Qız-Auldaki qanunsız arheologik işlerni 2015 senesinden başlap er yıl Rusiye İlimler Akademiyasınıñ işğal etilgen Qırım arheologiya institutı keçire, ve ruslar anda qıymetli arheologik eşyalarnı, şu cümleden cenaze eşyalarını çıqarıp alalar, dep Bİİ bildirdi.
Bundan ğayrı, Bİİniñ bildirgenine köre, VI asırdan evelki beşik urufatları ile balıq şeklinde çurinğamuzıka çalğı aleti ve 462-nci çurinğa işğalciler 2025 senesi Zaporijjâ vilâyetindeki "Taş qabir" unikal abidesinden işğal etilgen Qırımğa — "Hersones"ke alıp kettiler.
"Ukrayina Mudafaa nazirliginiñ Baş idaresi War&Sanctions portalınıñ "Hırsızlanğan miras" bölüginde işğalciler tarafından hırsızlanğan 20 ukrayin medeniy degerligi, em de qanunsız arheologik işler, tarih bozulması ve ukrayin topraqlarınıñ işğali içün sebep olğan Ukrayinanıñ vaqtınca işğal etilgen topraqlarındaki yedi şahıs ve eki müzey aqqında malümatnı derc ete. Ukrayina Mudafaa nazirliginiñ Bİİ istilâcınıñ tarihnı yañıdan yazmaq ve işğalni qanunlaştırmaq ıntıluvlarına qarşı sistemli işni devam ete", — dep haberde qayd etildi.
Rusiye arheologları Qırımnıñ medeniy mirasını nasıl zapt etkenleri ve onı teşviqat aletine çevirgeni aqqında — Suspilne Qırımnıñ maqalesinde oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
