İşğalli Qırım adliye nazirine Ukrayinada duşmannen işbirlik faaliyetinde şübe bildirdiler. Onı 10 yılğa qadar apis cezası bekley.
Qırım ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad ) şeeri prokurorlığı bildirdi.
Tahqiqat, yarımada işğalinden evel şübelengen adam advokat olıp çalışqanını qayd etti. Rusiye kontrolindeki "nazirlik"niñ yolbaşçısı olaraq o, 10 yıldan ziyade çalışa.
"2024 senesi üçünci kere bu vazifege tayinlendi, anda o, şahsen devletniñ uquqiy siyasetini yerine ketire edi. Hususan, adam işğal etilgen yarımadada istilâcı devletniñ qanunlarınıñ amelge keçirilmesini temin ete, oña boysunğan organlarnıñ, şu cümleden barışıq mahkemecileriniñ faaliyetini idare ete, Rusiye Federatsiyası akimiyetini tasdıqlamaq içün diger vazifelerni eda ete", — dep haberde qayd etildi.
2014 senesinden başlap yarımadanıñ işğalli adliye nazirligini Oleğ Şapovalov idare ete. Suspilne Qırımnıñ menbaları da anonimlik şartınen tamam bu adamğa şübe bildirilgenini tasdıqlay. Şübeli AQŞ, Kanada, Büyük Britaniya ve Ukrayinanıñ sanktsiya cedvellerinde buluna.
Prokurorlıq qayd etti ki, Ukrayina Anayasasınıñ 62-nci maddesine binaen, şahıs cinayet işlegeninde qabaatsız sayıla ve qabaatı qanuniy şekilde isbatlanıp, mahkeme tarafından qabaatlav qararı çıqarılğance, cinaiy cezağa oğratılmay.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
