İşğal etilgen Qırımda Rusiye quvetçileri tarafından "Ukrayina mahsus hızmetlerine arbiy obyektler aqqında malümat bergeninde" qabaatlanğan Canköy rayonınıñ sakini "mahkeme"ge berildi.
Rusiye kontrolindeki Qırım prokuraturası bu aqqında bildire.
Rusiye tahqiqatınıñ versiyasına köre, 48 yaşında olğan adam "içtimaiy ağlarda Ukrayina Telükesizlik hızmetiniñ vekili ile subetleşe edi" ve "Rusiye arbiy obyektleriniñ yerleşüvi aqqında malümat toplamaq vazifesini aldı".
"Adam silâ, tehnika ve mudafaa inşaatlarınıñ yerleştirilüvi aqqında malümat topladı. Foto ve videonı Kıyivniñ mütehassıslarına yolladı", — dep prokuratura haberinde aytıla.
Rusiye uquq qoruyıcılarınıñ bildirgenine köre, 2024 senesi devamında adam "arbiy uçaq ve naqliyatnıñ foto ve videolarını çıqarıp, bu malümatnı yollağan edi".
Cinaiy iş Rusiye kontrolindeki Qırım Yuqarı mahkemesine teslim etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
