Varşavada saban ayınıñ 20-nden itibaren "Uyazdovskiy qalesi" Zemaneviy sanat merkezinde "Qırım aqqında aytqanda ne aqqında aytamız" ve "Bu pişik cenk vaqtında resimlengen edi" adlı eki sergi açıldı.
Poloniyadaki Ukrayina elçihanesi Facebookta bu aqqında haber etti.
"Qırım aqqında aytqanda ne aqqında aytamız" sergisi 2014 senesi Rusiye işğalinden soñ Qırımnı hatıra, kimlik ve ğayıp alanı olaraq añlağan ukrayin ve qırımtatar ressamlarını birleştire. Olarnıñ eserleri ev, sürgünlik, ağrı, tirenüv ve ümüt aqqında şahsiy ikâye ola", — dep haberde aytıla.
Açılışqa diplomatik korpus, Poloniya ükümet daireleri, medeniy müessiseler, em de ukrayin, poloniyalı ve qırımtatar cemiyetiniñ vekilleri keldi.
"Ukrayin ressamlarına minnetdarım, olarnıñ işleri içki küç, sabır ve aqiqatqa sadıqlıqnı köstere. Aynı zamanda diger memleketlerniñ ressamlarına birdemligi ve bu umumiy tecribeni añlamağa azır olğanları içün teşekkürler bildirem", — dep Ukrayina Elçisi Poloniya Cumhuriyetinde qayd etti.
Aynı zamanda "Bu pişik cenk vaqtında resimlengen edi" sergisi 25 memleketniñ ressamlarını birleştirdi ve cenk ve buhran şaraitlerinde sanatnıñ rolü meselelerini köterdi.
"Qırım aqqında aytqanda ne aqqında aytamız" sergisi 2026 senesi ilk yaz ayı 28-ne qadar, "Bu pişik cenk vaqtında resimlengen edi" sergisi 2026 senesi ilk küz ayı 13-ne qadar devam etecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
