Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) işğalli akimiyet Ğalebe prospektinde 10-ncı gimnaziyanıñ yanında çoq qatlı binanıñ qurulmasına razılıq berdi. Qurucınıñ mektep azbarında ev qurmaq niyeti 2008 senesi peyda oldı, amma 2013 senesi faalciler qurucılıqnı toqtatıp oldılar. Rusiye işğali vaqtında qurucığa davalı qurucılıqqa "izin" berdiler.
"NTS Sevastopol" Rusiye tarafdarı olğan telekanalınıñ YouTube saifesinde qurucılıq işleriniñ yañıdan başlaması aqqında aytıla.
Kanal jurnalistleriniñ malümatına köre, qara qış ayınıñ soñunda oquv yurtunıñ yanındaki topraqta ağır qurucılıq tehnikası peyda oldı. Leyha vesiqalarına binaen, eki yıl içinde Sevastopolnıñ (Aqyarnıñ) 10-ncı gimnaziyası yanında 11 qatlı bina peyda olacaq.
"Ukrayina zamanında, cemaatnıñ basqısı altında, qurucılıq yasaq etilgen edi. Onı ne içün ğayrıdan tiklegenlerini bilmeyim, amma ağır tehnika çalışqanını köremiz", — dep jurnalistlerge "Bizim Aqyar şeerimiz" cemaat areketiniñ azası Pavlo Volkov ayttı.
İşçiler 2026 senesi yerli gaz stantsiyasını "işke alıp", evelleri 20 yılğa kirağa alğan qurucılıq meydanını qanunsız kenişletti, dep telekanal bildirdi.
Qurucı "Rekom YG" şirketi ola, o obyektniñ pasportında qayd etilgen. 2013 senesi ukrayin prokurorlığı yerli akimiyetni 2014 senesinden soñ Rusiye cedvellerinde peyda olğan ve ukrayin şirketiniñ mirasçısı olğan teşkilâtnen kira añlaşmasını toqtatmağa mecbur etti.
Yerli sakinler teşebbüs gruppasına birleşip, gimnaziya yanında çoq qatlı binanıñ qurulmasına qarşı çıqalar. Deyler ki, vesiqalarğa köre, bu topraq Vorontsov Dağınıñ planında mektep bağçası olaraq belgilengen.
Bu arada Forpost Sevastopol neşiri işğalli "memarlıq ve şeer qurucılığı departamenti"ne muracaat etti, olarğa qurucılıq ruhsetnamesi "qanuniy olaraq berildi" ve leyha vesiqaları 2023 senesi ilk qış ayınıñ 4-nde teşkerildi, dep cevap berdiler. 2024 senesi mayısnıñ 30-nda 91-04-1074-2024 nomeralı inşaat ruhsetnamesi berildi. "Müessise"niñ malümatına köre, obyektniñ qurucılıq nezareti 2025 senesi ilk qış ayından başlanacaq.
"2013 senesi isyan oldı, ve Sevastopollılar öz aqları içün küreşte isyan etmege qorqmay ediler. Qayd etmeli ki, qurucılıq parkanını o vaqıt mektep talebeleri, em de yerli "Sevastopol" futbol klubınıñ fanatları yıqtılar. Olardan çoqusı Donbasnı azat etmek içün Ukrayina tarafında cenkleşmege ketti. Şimdi vaziyet farqlı. Vatandaşlar Rusiye akimiyetine muracaat etmey, yalıñız kütleviy haber vastalarını piketke davet etmek içün cesaretleri yetti, bu piket içün izin aynı akimiyetten alınmaq kerek edi. Razvojayev birden, Rusiye Devlet duması saylavları arfesinde vaziyetni kerginleştirmemek kerek, dep qarar alsa, o zaman qurucılıq toqtatılacaq ya da saylavlar keçirilgenine qadar toqtatılacaq. Ve eger o, er şey qanuniy olğanını aytsa, o zaman faalcilerniñ şansı yoq. Şimdi kerçeklik budır", — dep Qırım.Aqiqatqa Qırımnıñ azat etilmesi içün halqara areket #LIBERATECRIMEAnıñ Sevastopol faalcisi izaatladı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
