Rusiye, saban ayınıñ 18-ni — Qırım işğaliniñ yıllığını — teşviqat şousına çevirdi. İşğalciler bu kün kontsert, avtoyürüş, mektep talebeleri içün "vatanperverlik dersleri"ni planlaştıralar.
Milliy muqavemet merkezi bunı bildirdi.
"Rusiye mekteplerinde ve medeniyet evlerinde ustalar sınıfları, sergiler, "tarih saatleri" keçirile, anda balalarğa "Rusiye Qırımınıñ ebediyeti" ğayesi aşıla. Teşviqat, zemaneviy tecavuznı XVIII asırnıñ adise-vaqialarınen aqlap, küç aqqı dünya tarafından tanılğan Ukrayina sıñırları ve suverenitetinden daa müim olğanını isbatlamağa tırışa", — dep haberde qayd etildi.
İşğalli memuriyetniñ vekilleri, kerçekni gizlemek içün "yañı Qırımnıñ qurulması" aqqında bildireler — yarımadanıñ qapalı arbiy bazağa çevirilmesi ve razı olmağanlarnıñ sistematik taqip etilmesi", — dep haberde bildirildi.
MMM qayd etti ki, bu tedbirlerniñ maqsadı "bayram" degil de, "tarihiy adalet" illüzsiyasını, hususan gençlerniñ añlarında pekitmektir.
"ru-teşviqatı yarımadanıñ zapt etilüvini "neo-natsizm" ve "devrim"den qorçalav aqqında miflernen aqlay. "Tış duşman" süretini yaratmaq içün qullanılğan böyle taktik, qanunsız işğal ve referendumdan diqqatnı ayırmaq içün qullanıla", — dep MMM yazdı.
Hatırlatamız ki, Qırım işğali yılları devamında eñ az 430 insan siyasiy sebeplerden mahkeme etildi, kerçek raqam 500-den ziyade ola bilir. Şimdilik apishanelerde aman-aman 300 insan buluna, olardan 158-i qırımtatardır.
Ukrayina Tış işler nazirliginiñ 2014 senesi saban ayınıñ 16-nda yarımadada keçirilgen qanunsız referendumnıñ 12 yıllığına dair beyanatında bu aqqında aytıla.
2014 senesi saban ayınıñ 16-nda Rusiye yarımadada referendum keçirdi, saban ayınıñ 18-nde ise işğalciler sahte añlaşma imzalap, Qırımnıñ Rusiye Federatsiyasına qoşuluvı aqqında qanunsız ilân ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
