İşğal vaqtında Qırımda eñ az 430 insanğa qarşı siyasiy sebeplerden davalar açıldı, amma aqiqiy sayısı 500den çoq ola bilir. Şimdi apishanelerde aman-aman 300 insan tutula, olardan 158-i qırımtatar.
Ukrayina Tış işler nazirliginiñ qanunsız referendumınıñ 12-nci yıllığına dair beyanatında bu aqqında aytıla.
"Olarnı acelen azat etmege ve Ukrayinağa telükesiz şekilde qaytarmağa, olarnıñ aqlarını yerine ketirmege, halqara gumanitar uquqqa binaen kerekli tibbiy yardım etmege talap etemiz", — dep qayd etildi.
Ukrayin topraqlarınıñ işğali — Ukrayinanıñ suvereniteti ve topraq bütünliginiñ qaba bozulmasıdır, BMTnıñ Nizamnamesi, Helsinki aktı kibi temel qoyğan halqara uquq printsipleri ve başqa temel qoyğan halqara-uquqiy vesiqalarnıñ qaba bozulmasıdır, dep nazirlik hatırlattı.
"Qırımnı ihlaq etmek ıntıluvı, BMTnıñ azası olğan devletlerniñ büyük qısmı tarafından Baş Assambleyasınıñ bir qaç rezolütsiyasında takbih etrildi. Moskvanıñ bir qaç ittifaqdaşından ğayrı, dünyada kimse rusiyeniñ yarımdan işğalini tanımaz. Halqara ükümet ve ükümet olmağan teşkilâtlar, uquq qorçalayıcılar ve faalcilerni rusiyeniñ Qırımdaki insan aqlarınıñ bozuqlarına diqqat etmege çağıramız", — dep TİNniñ beyanatında qayd etildi.
Hatırlatmaq kerek ki, Rusiyeniñ Qırımda keçirilgen qanunsız referendumınıñ on ekinci yıllığında, Türkiye Tış işler nazirligi yarımadadaki de-fakto vaziyetni tanımağanını ve Ukrayinanıñ mustaqilligini, suverenitetini ve topraq bütünligini qattı yaqlağanını bildirdi. Qırımtatarlarnıñ vaziyeti de ayrı diqqat ayırılacaq.
Daa evel Suspilne Qırım 2014 senesi Qırımda qanunsız referendum nasıl keçirilgenini talil etken şaat ve mğtehassıslarnen laf etti, anda yarımadanıñ Rusiyege "qoşulması" içün reylerniñ 80%-i ve 97%-i beriddi. Bu aqqında tafsilâtlıca "Başta aqıllarnı, soñra yarımadanı zapt etmege tırıştılar": 10 yıl evel Rusiye Qırımda sahte referendum keçirdi" adlı maqalede oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
