İşğalli Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) akimiyeti saban ayınıñ 16-nda gece maalinde ukrayin dronları ücüm etkenini bildirdi. Rusiye Mudafaa nazirligi Qırım üzerinde üç ukrayin dronını tüşürgenini bildirdi, "Qırım yeli" nezaret Telegram kanalınıñ analitikleri ise, Rusiye arbiy hızmetçileri yerleşe bilecek Arabat beli rayonındaki pansionatlarda yanğınnı qayd ettiler.
Saban ayınıñ 16-nda Sevastopolda (Aqyarda) dronlarnıñ ücüm etkeni aqqında Telegramda "gubernator" Mihail Razvojayev yazdı.
"Sevastopolda AMS ve Qara deñiz flotunıñ quvetleri USQniñ ücümini yoq ete. 2 ava maqsadı endi yoq etildi. Sevastopol (Aqyar — terciman) qurtaruv hızmetiniñ malümatına köre, şeerde iç bir vatandaş obyekti zarar körmedi. Açıq yerlerni terk etiñiz ve telükesiz yerlerde bulunıñız. Arbiy hızmetçilerimiz duşman UUAlerini çeşit zarar etici vastalar, şu cümleden, atıcı silâlarnen yoq etmege tırışa. Maqsatqa yetmegen qurşunlar serbest tüşüvniñ tezletilmesinen er vaqıt keri qayta", — dep Razvojayev saban ayınıñ 16-nda yazdı.
RF Mudafaa nazirliginiñ malümatına köre, bu gece AMS Qırımda üç dronnı yoq etti.
Ukrayina tarafı işğal etilgen Qırımğa ücüm aqqında resmen tefsir etmedi.
Bu arada "Qırım yeli" Telegram kanalı, uydu resimlerinden alınğan malümatqa esaslanıp, Arabat beli rayonında yanğın aqqında bildirdi. Anda, olarnıñ malümatına köre, "Dnepr" taqımınıñ Rusiye komandanlığı yerleşken pansionatlarda yanğın çıqtı.
Hatırlatamız ki, Rusiye bildirdi ki, saban ayınıñ 16-na keçer gecesi Krasnodar ülkesi uçucısız uçaq aletleriniñ ücümleri altında qaldı. Qayd etilgenine köre, uçucısız uçaq aletleri Labinsk ticaret zonasına ücüm etti, anda neft bazası yerleşe.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
