Rusiye quvetçileri bildirdiler ki, işğal etilgen Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) yaşağan 45 yaşındaki kişini tuttılar. Onı "Qırımdaki Rusiye arbiy obyektleri aqqında malümat toplağanı"nda qabaatlaylar. Rusiye tahqiqatınıñ versiyasına köre, o, "kritik obyektlerni avada qorçalağan arbiy tehnikanıñ fotoresimlerini çıqardı ve olarnı Telegram messencerinen ukrayin istihbaratına yolladı".
TASS Rusiye devlet agentligi, Rusiye FSBsindeki menbalarğa esaslanıp, bunı bildirdi.
"Federal havfsızlıq hızmeti, Qırım yarımadasında RF Silâlı quvetleriniñ obyektleri aqqında malümat toplağan Ukrayina mahsus hızmetleriniñ agentini tuttı. Feodosiya (Kefe — terciman) şeeriniñ 45 yaşındaki sakini Telegram messenceriniñ yardımınen ukryain tarafına ava boşluğını qaravul etmekte ve yaqarlıq-energetika kompleksiniñ kritik astyapı obyektlerini avadan qorçalavda iştirak etken arbiy tehnika aqqında malümat bergen fotomateriallarnı yollağanı belli oldı", — dep haberde qayd etildi.
Rusiye FSBniñ fikirince, bu malümatnı Ukrayina RF Silâlı quvetleriniñ mevamlarına top ve raketa ücümlerini uyğunlaştırmaq içün qullandı.
Adamğa qarşı qanunsız şekilde "devlet hainligiRF CQniñ 275-nci maddesi" maddesine istinaden cinaiy dava açıldı. TASS malümatına köre, o şimdi nezaret altında buluna.
TASS Telegramda adamnıñ tutuluvı ve mahkeme etilmesi videosını derc etti.
Hatırlatamız ki, daa evel Irade teşebbüsiniñ qapalı maruzasına esaslanıp, "Tribunal. Qırım epizodı" uquq qorçalayıcı teşebbüsi bildirdi ki, Rusiye içtimaiy ağlarında işğal etilgen Qırım sakinlerini öz fikirleri içün afu soramağa mecbur etken videolarnıñ sayısı eksildi. Aynı zamanda uquq qorçalayıcılar Rusiye qanunlarınıñ "aşırıcılıq" ve "terrorizmni aqlav" maddelerine istinaden cinaiy taqiplerniñ artqanını qayd eteler. Nezaretniñ malümatına köre, böyle taqipler içün Ukrayinağa qoltutuv lafları bile sebep ola bile.
"Tribunal. Qırım epizodı" teşebbüsiniñ malümatına köre, 2025 senesi yazdan başlap böyle davalarnıñ sayısı dört qat arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
