Rusiye FSBsiniñ eki hadimi işğal etilgen Qırımnıñ sakinini qanunsız apiske alğanı ve işkence etkenleri içün mahküm etilecek. Qabaatlanğanlar 15 yılğa qadar apis cezasını ala bileler.
Qırım Muhtar Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokruorlığı bunı bildirdi.
Taqiqatnıñ malümatına köre, qabaatlanğanlar — UHHniñ Qırım Muhtar Cumhuriyetindeki Baş idaresiniñ sabıq hadimleri, yarımada işğal etilgen soñ Rusiye kontrolindeki FSBniñ Qırım ve Sevastopoldaki (Aqyardaki) idaresine hızmetke keçtiler.
Prokurorlıq qabaatlanğanlarnıñ adlarını aytmadı, amma Suspilne Qırımnıñ haberdar olğan menbaları aytqanı kibi, söz Oleksandr Kompanaytsev ve Oleksandr Manjos aqqında kete.
Taqiqatçılar, yañı vazifelerde olar Rusiye tarafından terroristik sayılğan "Hizb ut-Tahrir" teşkilâtında iştirak etkeni içün qırımtatarlarğa qarşı taqiplerde iştirak etkenlerini qayd ettiler.
Hususan, 2016 senesi Yalta sakininiñ cemaat faaliyeti aqqında malümat alğan soñ, quvetçileri onıñ evini qanunsız şekilde tinttiler. Bundan soñ onı tutıp, işğalli FSB idaresiniñ binasına alıp kettiler.
Prokurorlıqnıñ malümatına köre, Qırım sakini altı saatten ziyade sorğuğa çekildi, ondan yasaq etilgen teşkilâtlarnen alâqası bar olğanını itiraf etmesini talap etip, onı işkencege oğrattılar. Er kes kerekli delillerni bermege red etkende, işkence daa da quvetleştirile edi: elleri plastik paketlernen bağlanıp, vesiqalarnı imzalamaq içün polietilen paketlernen boğula ediler.
Qabaatlanğanlarnıñ areketleri cenk qanunları ve adetleriUkrayina CQniñ 28-nci maddesiniñ 2-nci qısmı, 438-nci maddesiniñ 1-nci qısmıniñ bozuluvı, devlet hainligiUkrayina CQniñ 111-nci maddesiniñ 1-nci qısmı olaraq tanıla, olardan biri de mesken toqunılmamazlığıUkrayina CQniñ 162-nci maddesiniñ 1-nci qısmı bozuluvında qabaatlana. Qabaatlayıcı vesiqalar mahkemege yollanıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
