İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) bütün ev subetleri Rusiye devletiniñ MAX messencerine keçirildi. Onıñ vastasınen ev sakinleri şikâyetlerinen idare etici şirketlerge ve "Gosjılnadzor"ğa muracaat ete bileler.
Saban ayınıñ 13-nde "Sarı şerit" cemaat areketiniñ X saifesinde bu aqqında haber etildi.
"Yañı teşebbüs resmen sakinler içün bir hızmet olaraq taqdim etile, lâkin kerçekten bu, vaqtınca işğal etilgen şeerde insanlarnıñ yaşayışını merkeziy şekilde nezaret etüvniñ daa bir usulıdır", — dep faalciler qayd ettiler.
Rusiye 2025 senesiniñ başından işğal etilgen Qırım mekteleri, aliy oquv yurtları ve devlet müessiselerinde MAX messencerini kütleviy şekilde kirsetmege başladı.
Raqamlı havfsızlıq mütehassısı Pavlo Belousov onı "telefondaki casus" dep adlandıra: qullanma mikrofon, kamera, geolokatsiya ve mektüpleşüvge irişip, smartfonnı nezaret aletine çevire. Onı çıqarmaq imkânsızdır, şunıñ içün mütehassıs telükeni azlaştırmağa tevsiye ete.
Bu Rusiye messencerinden qorçalanmaq içün daa tafsilâtlı malümatnı Suspilne Qırım maqalesinde oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
