İşğal etilgen Bağçasarayda Qırım siyasiy mabüsleriniñ qorantaları, 2020 senesi saban ayında Rusiye quvetçileri tarafından tintüvler vaqtında tutulğan soy-soplarınıñ apiske alınmasınıñ altıncı yılığında toplu dua keçirdiler.
"Qırım birdemligi" bunı bildire.
Duada iştirak etken Seitumer Seitumerovnıñ apayı Pakise, siyasiy mabüslerniñ qorantaları yaşağan ağır şarait aqqında tarif etti.
"Muqaddes Ramazan ayında, vaqıtnı faydalı keçirmek istegen vaqıt, iftar aqşamları ve saba suhur — qorantalar arasında, bizim kerçekligimiz bam-başqa. Aileler biñlernen kilometr uzaqlığında bir-birinden ayırıla, ve qadınlar eki ana-babanıñ rolüni icra etmek mecbur. Yüce Yaratıcımızğa dua etip, er şey yahşı bitsin, yolumıznı qolaylaştırsın, sabır ve dayanıqlıq bersin dep yalvardıq", — dep o tarif etti.
Seitumer ağa-qardaşlarınıñ anası ve Rustem Seitmemetovnıñ qız qardaşı Lilâ qayd etti ki, tuvğanlarınıñ apiske alınğan yılları bütün qoranta içün ağır sınav oldı.
"Bu mubarek künlerde bizler Yüce Allahtan sabır ve bütün qıyınlıqlarnı yeñmek küçüni, tezce azat etilmek ve er kesniñ öz qorantalarına qaytması içün rica etemiz", — dep qayd etti o.
Amet Süleymanovnıñ ömür arqadaşı Lilâ Lumanova da qorantası devam etken sınavlarnı qayd etti.
"Altı yıldan berli qorantamız ağrı ve adaletsizlik duyğusınen yaşay. Bu yıllar içinde pek çoq şey oldı - ağır sınavlar, qorqu ve beklevler. Amma biz Yüce Yaratıcığa sabır ve sabır köstergeni içün minnetdarmız, hususan bu muqaddes künlerde", — dep o ayttı.
"Hizb ut-Tahrir davası"nıñ üçünci Bağçasaray gruppası aqqında ne bilemiz
2020 senesi saban ayınıñ 11-nde Bağçasarayda qırımtatarlarnıñ bir qaç evinde tintüvler keçirildi: Enver Mustafayev, Amet Süleymanov, ağa-qardaş Seitumer ve Osman Seitumerovlar, olarnıñ dayısı Rustem Seitmetmetov.
Tutulğanlarnıñ episi 2003 senesinden berli Rusiyede yasaq etilgen "Hizb ut-Tahrir" teşkilâtınıñ azası olğanında qabaatlana. Ukraina toprağında ve dünyanıñ memleketleriniñ çoqusında teşkilât milliy qanunlar seviyesinde sıñırlanmayıp çalışa.
Dava malümatına köre, qabaatlanğanlarnıñ elinde silâ, patlayıcı maddeler, arbiy yedekler yoq edi, olar terror aktını yapmağa planlaştırmay ve başqalarını terror aktlarına çağırmay ediler. Dava malümatlarında Bağçasaray camilerinde diniy ve siyasiy mevzularda muzakerelerniñ audio yazıları bar.
Mayıs ayında "Memorial" uquq qorçalayıcı merkezi dört Qırım sakinin siyasiy mabüs olaraq tanıdı, olar "Hizb ut-Tahrir davası"nıñ üçünci Bağçasaray gruppasınıñ mabüsleri Seitumer Seitumerov, Osman Seitumerov, Amet Süleymanov ve Rustem Seitmetmetov.
2021 senesi orta küz ayınıñ 29-nda Rostov-na-Donudaki Cenübiy bölgeniñ arbiy makemesi ükümlerni qabul etti: Seitumer Seitumerov sert rejimli müstemlekede 17 sene, Osman Seitumerov 14 sene, Amet Süleymanov 12 sene, Rustem Seitmetov 13 senege maküm etildiler. Advokatnıñ bildirgenine köre, maküm etilgenlerniñ episi 3 sene ve 6 ay apishanede keçirmeliler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
