Saban ayınıñ 20-nde Varşavadaki "Uyazdovskıy sarayı" zemaneviy sanat merkezinde "Qırım aqqında laf etkende ne aqqında laf etemiz" sergisi açılacaq. O, zemaneviy ukrayin ve qırımtatar ressamlarınıñ eserleri vastasınen halqara auditoriyağa yarımadanıñ tarihını añlatacaq.
Ukrayina prezidentiniñ Qırım MCdeki temsilciligi bu aqqında haber berdi.
Temsilcilikniñ haber bergenine köre, sergi sanat vastasınen 2014 senesi Rusiye Qırımnı işğal etken soñ ğayıp, qarşılıq tecibesini ve medeniyet hatırasını añlatqan sanatçılarnıñ eserlerini birleştire.
Sergide Oleksiy Borısov, Yuriy Yefanov, Emine Ziyatdin, Vlodka Kaufman, Pavlo Makov, Rustem Skıbin, Oleğ Tistol ve başqa sanatçılarnıñ eserleri taqdim etilecek.
Leyha "Küçlü Ukrayina içün ortaqlıq" programmasınıñ desteginen Ukrayina institutınıñ emirinen "Keçmiş / Kelecek / Sanat" hatıra medeniyeti platforması tarafından teşkil etildi. Serginiñ idarecileri Katerına Semenük, Oksana Dovğopolova ve Alim Aliev oldılar.
Sergi 2026 senesi ilk yaz ayınıñ 28-ne qadar devam etecek. Esas sergiden ğayrı, cemaat programması planlaştırıla, şu cümleden, idarecilik ekskursiyaları, ressamlarnen körüşüvler ve Qırımnıñ medeniy tarihı ve işğalden qurtaruv meseleleri boyunca munaqaşalar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
