İşğalciler 2021 senesinden başlap Aqyarda (SevastopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) acele yardım hastahanesini qura ve şimdi leyha tasdıqlav basamağında. Aqyarnıñ (Sevasopolnıñ) işğalci gubernatorı Mihail Razvojayev, evelki leyha kerçekleştirilmesi imkânsız olğanı içün leyha bütünley yañıdan işlenmek kerek olğanını bildirdi. Sanktsiyalar sebebinden bina içün azırlanğan donatmalarnı ketirip olamadılar.
O Qırımnıñ "ükümet" kanalında canlı yayında bu aqqında ayttı, dep FortPost yaza.
"Netice olaraq, leyhanı yañıdan azırlamaq kerek oldı, şu cümleden binanıñ müendislik ağlarında, avalandırma sistemasında ve atta qapı kirişleriniñ konstruktsıyasında deñişmeler kirsetildi. "Rossiya 24" telekanalına bergen intervyusında gubernator böyle deñişmelerniñ qaçınılmaz olğanını qayd etti", — dep haberde aytıla.
Bu sene İşğalcilerniñ Arbitraj Mahkemesi hastahane qurğan şirketniñ davasını baqıp çıqtı.
"Teşkerüvniñ birinci qısmı Rusiye Federatsiyasınıñ Esap palatası tarafından yapıldı ve "RT-SotsStroy" sıñır şirketi tarafından uquqiy bozuvlar tapıldı. Şu cümleden, baş mütehassısnıñ, subkontrakt teşkilâtlarınen imzalanğan añlaşmalar aqqında, em de olarnıñ belgilengen müddetlerde yapqan işleri aqqında malümatı yoq edi. Ekinci teşkerüv — FAU "RosKapStroy" tarafından yapıldı — tam qurucılıq meydanında bozuvlarnı taptı. Hususan, telükeli iş alanınıñ signal qamaçavı, yeşilliklerniñ qoruv qamaçavı, em de iç qurucılıq yolları ve keçitleriniñ şemaları aqqında söz yürsetile, olarda malzeme saqlav yerleri, naqliyat vastalarınıñ çevirilüvi ve yanğın suv teminatı obyektleri qayd etilmeli", — dep haberde aytıla.
İşğalciler hastahaneniñ qurucılığını 2021 senesi başladı ve 2026 senesi bitirmege planlaştıra ediler.
Hatırlatamız, işğalciler Qırımda Yaltadaki çoq saalı tibbiy merkeziniñ ve hadimler içün 17 qatlı mesken kompleksiniñ qurucılığını toqtattılar.
Bunı Milliy tirenüv merkezi bildire. Merkezniñ malümatına köre, qurucılıq parası hırsızlandı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
