2014 senesi Qırım Rusiye tarafından işğal etilgen soñ, yaşlar yarımadada işğalcilerniñ siyasetiniñ prioritetlerinden biri oldı. Rusiye akimiyeti tasil programmalarını deñiştirmekte, ukrayin tilini yoq ete, ukrayin tarihı ve medeniyetine irişimni sıñırlay. Böyleliknen Qırım gençlerinde Rusiyege sadıq olğan yañı kimlik şekillendirile.
Ukrayina prezidentiniñ Qırım Muhtar Cumhuriyetindeki temsilciligi bu aqqında bildire.
"2022 senesinden soñ bu esnas daa açıq olacaqtır. Evelden gençler mefküreviy ceetten "terbiyelengen" olsa, şimdi olarnı Rusiye ordusında ileride hızmet etmege azırlaylar — arbiyleştirilgen taqımlar, arbiy lagerler, arbiylerniñ mektep ve universitetlerde iştirak etmesi vastasınen. Bu tendentsiya bütün Rusiye territoriyasında körüne, lâkin işğal etilgen Qırımda hususiy alâmetler bar: mında mefküreviy basqı, ealiniñ iqtisadiy zayıflığı ve maqsatlı rekrutirlev kampaniyası birleştirile", — dep müessisede qayd eteler.
2026 senesiniñ ilk eki ayı devamında temsilcilik, gençlerni Rusiye Silâlı quvetlerinde arbiy hızmetke çağıruvğa doğrultılğan tedbirlerniñ artqanını qayd etti.
"Mekteplerde ve aliy oquv yurtlarında teşviqat stendleri peyda oldı, olarda "motivatsion" tedbirlerge barmaq ya da "proforientatsiyada" iştirak etmek teklifleri bar. Aynı zamanda talebeler tek davet etilmey, aynı zamanda böyle tedbirlerge faal sürette qoşula. Misal olaraq, kiçik aynıñ 24-nde Aqmescitte (SimferopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) "Vernadskiy adına Qırım federal universitetiniñ" ve orta zenaat tasil müessiseleriniñ tahminen biñ talebesi iştirak etken tedbir keçirildi. "Qırımpatriotik Merkezi" adlı teşkilât, top, avtomat, silâ sergisi ve ev tibbiy yardımınıñ kösterilmesinen tematik yerlerni açtı. Kiçik aynıñ 26-nda Aqyarda (Sevastopolda) biñden ziyade student forumda iştirak etti, anda arbiy areket iştirakçileri cebede uçucısız uçaqlarnı qullanuv taktikası aqqında tarif etti, arbiy komissarlıqlarnıñ vekilleri ise muqavele tizilmesi içün kontaktlar berdi. Yani, aslında bu tasil aqqında degil de, gençler arasında cenkni er künlik olaraq qabul etüv aqqında söz yürsetile", — dep temsilcilikte qayd eteler.
Rusiye arbiyleri de, hususan Rusiyeniñ Cenübiy arbiy okrugından, tehnikumlarda dersler alıp barıp, yañı yaratılğan "arbiy uçaqsuz sistemalarnı" populârlaştıralar.
"Studentlerge dronlar kösterile ve Ukrayinağa qarşı arbiy areketlerde qullanılğanı aqqında tarif etile. İşğal etilgen yarımadanıñ mekteplerinde arbiy komissarlar 9-11 sınıf talebelerinen körüşip, olarnı hızmetniñ "perspektivligine" inandıralar. Aynı zamanda işğalci "idaresi" maliyeviy "motivatsiyanı" arttıra. Hususan, "Sevastopol gubernatorı" sözde añlaşma imzalav içün bir kerelik ödeme 2,3 million rublege (1,2 million grivna — muarrir), em de topraq damartısı ya da qoşma million ruble (tahminen 500 biñ grivna — muarrir) berilmesi aqqında bildirdi. Qırımnıñ teşviqat materialları eñ yüksek tölevlerni de ilân ete - birinci yılda "regional tazminatlarnen" 5 million rublege qadar (≈2,5 million ğrıvnâ — muarrir) — prezidentniñ temsilciligi haber ete.
Temsilcilikniñ qayd etkenine köre, bu eñ zayıf insanlarnen, yani işğal altında öskenlernen, em de balalıqtan berli "Yunarmiya" kibi arbiyleştirüv programmalarına celp etilgenlernen ve inkişaf imkânlarından marum qalğanlarnen iş tutmaq demektir.
"Olarnıñ çoqusı içün millionlarnen paralar, işğal iqtisadiyatnı, tasilni ve perspektivalarnı yoq etken bölgede tek içtimaiy asansör kibi körüne. Rusiye öz yaratqan çorını parağa çevire. Birinciden, izolâtsiya, sıñırlav ve sistematik propaganda. Soñra — Rusiye Silâlı quvetleri ile añlaşmalarnı imzalamaq "iñ kârlı teklif". İşğalci akimiyet Qırım gençlerini Rusiye alıp barğan cenklerniñ devamı içün resursqa çevirmekte", — temsilcilikte deyler.
Ukrayina nazirliginiñ bildirgenine köre, Rusiye ordusınıñ saflarına kirgen Qırım gençleri "sistemniñ rehineleri" ola.
"Nazirlik muqaveleriniñ talilinden belli olğanı kibi, sınav müddetinden soñ, muqaveleni imzalağan şahıslar, hızmetniñ "fizikiy" ya da "telükesiz" hususiyetine dair sözlü teminlevlerge baqmadan, er angi vazifelerge, şu cümleden piyade askerligine keçe bileler. Bu kampaniyanıñ neticeleri uzun sürecek. Bütün bir nesilniñ kütleviy ölümleri, yaralanmalar, ğayıplar — bularnıñ episi teren içtimaiy yaralar yarata. Rusiye yarımadanıñ kelecekteki reintegratsiyası içün yavaş areketniñ mayınlarını qoymaqta. Qırımğa askerlikke celp etüv kampaniyası tek cenk aqqında degil. Bu gençlerniñ başqa kelecekke aqqını coymamaq ıntıluvıdır", — dep temsilcilik añlata.
Bundan evel Qırımdan #LiberateCrimea halqara kampaniyasınıñ faali, adını bildirmemek şartınen, işğal etilgen Qırımda Rusiye akimiyeti gençler arasında Ukrayina tarafdarı duyğularnıñ artqanından qasevetlengenini bildirgen edi. Cevap olaraq, işğalci ükümetniñ "tasil nazirligine" balalarnı cemaat teşkilâtlarına celp etmege ve tasil müessiselerinde Rusiyege qol tutqan teşviqatnı quvetleştirmege emir etildi.
"Qırımlı gençler daa sıq özleri Ukrayinağa qol tutqan haber resursları ve göñüllilernen bağğa çıqa, özleri ukrain tilini ögrene, özara qonuşa. Mektepni bitirgen soñ, bazıları Ukrayina kontrol etken topraqlarğa keteler, em de mektep ve student müitinde Rusiye teşviqatınıñ muvafaqiyetsizligini köstergen cesür intervyü bereler", — dep faal qayd etti.
Onıñ aytqanına köre, böyle bir tendentsiya Rusiye akimiyeti ve quvet strukturalarınıñ vekilleri arasında qapalı seviyede muzakere etilgen edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
