Kiçik ayda işğal etilgen Qırımdaki Livadiya sarayında ruslar "Novosti Krım" mühbiri Dmitriy Makeyevniñ fotoresimlerini numayış etken sergini açtılar. Resimlerde işğalciler Ukrayina Silâlı quvetlerine qarşı qabaatlavlarnı, hususan "vatandaş astyapısına ücümler"ni tarqattılar. Böyleliknen, müzey fondu siyasiy teşviqat ve ziyaretçiler arasında vaqialar aqqında deñiştirilgen fikirlerniñ şekillendirilmesi içün qullanıldı.
Qırımtatar resurs merkezi (QRM) bunı qayd etti.
"Böyleliknen, tarihiy mirasnı saqlamaq kerek olğan medeniy obyektler siyasiy teşviqatnı yayınlamaq ve ziyaretçiler arasında vaqialarnı yañlış añlamaq içün qullanıla. Qırımtatar Resurs Merkezi qayd ete ki, vaqtınca işğal etilgen yarımadadaki müzey meydanınıñ askeriyleştirilmesi ve siyasetleştirilmesi istilâcı devletniñ haber siyasetiniñ parçası ola. Medeniyet müessiseleriniñ arbiy teşviqatnı tarqatmaq içün qullanılması Qırım ealisine qarşı yapılğan mefküreviy basqınıñ daa bir delilidir", — dep haberde bildirildi.
Livadiya sarayınıñ Beyaz salonında kiçik aynıñ 20-nde "Vatan imayecileri" sergisi açıldı. Ruslar tedbirge balalarnı davet ettiler ve sanki "USQ sebebinden" işğal altında viran etilgen şeerlerge diqqatını celp ettiler — dep "Qırım yeli" Telegram kanalı fotoresimlerniñ bir qısmını alıp bildirdi.
"USQniñ Nova Kahovka memuriyet binasına ücüminiñ aqibetleri", — dep yıqılğan bina fotoresimlerinden birinde yazılğan.
Bundan da ğayrı, fotoresimlerniñ tariflerinde işğalciler "Mariupolnıñ ğayrıdan tiklenüvi, Kahovka GESnıñ yoq etilüvi" aqqında añlatalar ve işğal etilgen Ukrayina topraqlarınıñ sakinleri "Rusiye vatandaşları" olğanlarını iddia eteler.
Bundan evel, "Qırım yeli" Telegram kanalınıñ malümatına köre, "Hersones" müzey-qoruğında Ukrayina şarqındaki vaqialar aqqında teşviqiy filmler kösterildi.
Livadiya sarayı — Qırımnıñ cenübiy yalısında yerleşken Rusiye çarları Romanovlarnıñ eski yazlıq rezidentsiyası. 1945 senesi kiçik ayYalta (Qırım) konferentsiyası, 1945 senesi kiçik aynıñ 4-11 künlerida Sovetler Birligi, AQŞ ve Büyük Britaniya yolbaşçıları Ekinci cian cenkiniñ bitmesi ve cenkten soñ qurulış meselelerini çezmek içün anda toplaştılar. Cenkten soñ ilk yıllarda — bu Stalinniñ devlet yazlığı edi. Bugün o, bir saray-müzeydir.
Hatırlatamız ki, işğal etilgen Qırımda Rusiye akimiyeti gençler arasında Ukrayina tarafdarlarınıñ artmasından qasevetlene. İşğalli ükümetniñ "tasil nazirligi"ne balalarnı cemaat teşkilâtlarına celp etmege ve tasil müessiselerinde Rusiyege qol tutqan teşviqatnı quvetleştirmege emir etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
