İşğalciler Qırımdaki gençlerni pasportlaştırmağa devam eteler. İşğal altındaki "Artek" bala merkezinde 25 talebege Rusiye vesiqaları berildi.
Telegramda "Artek" HBMhalqara bala merkezi bu aqqında haber etti.
"Balalarnı tantanalı tedbirde Qırım İçki işler nazirliginiñ migratsiya meseleleri idaresiniñ yolbaşçısınıñ muavini Dmitriy Nemeroviç ve "Rusiye qaramanı" Artem Katunkin hayırladılar. "Biz — Rusiye vatandaşlarımız" areketiniñ "Birinci areket" programması çerçivesinde ilk pasportlarnı memleketniñ farqlı bölgelerinden 25 mektep talebesi aldı", — dep haberde qayd etildi.
Hatırlatamız ki, 2025 senesi işğal etilgen "Artek" merkezinde ruslar balalarğa 511 Rusiye pasportını zorlap berdiler. Bu, 2023-2024 seneleri anda çıqarılğan vesiqalarnıñ yarısından ziyadesi. 14 yaşına kelgen balalarnıñ episini Rusiyege sadıqlıq antını bermege mecbur ettiler.
"Biz — Rusiye vatandaşlarımız" teşviqat leyhası 2023 senesinden berli işğal etilgen "Artek" lagerinde amelge keçirile. Bu vaqıt devamında anda 914 bala pasport aldı, olardan 511-i — 2025 senesi.
Sahte malümatqa qarşılıq merkeziniñ malümatına köre, "Birinciler areketi" Sovetler Birliginiñ qabaatlavına oşağan. O, gençlerde "ananeviy rus maneviy ve ahlâqiy degerlikleri"ni şekillendirmege niyetlene.
"Aqiqaten, balalarda Ğarp ve demokratiyalarğa nisbeten nefret ögrenile. Ukrayinlerge nisbeten nefret ve cenkniñ aqlanuvı ayrı yer ala", — dep SMQM bildirdi.
2025 senesi Rusiye Federatsiyasınıñ devlet bücetinden bu areketniñ inkişafına 20 milliard ruble (≈ 10 milliar ğrıvnâ — muar.) ayırılacaq edi, bu ise "Putin rejiminiñ emiyetini köstere", dep SMQM qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
