Qırım siyasiy mabüsi Rustem Murasov 45 künden berli Saratov vilâyetiniñ Pugaçov şeerindeki 4-nci tüzetüv müstemlekesiniñ ceza izolâtorınıñ (ŞİZO) bir kişilik kamerasında tutula.
Qırımtatar resurs merkezi (QRM) bunı bildirdi.
"53 yaşındaki siyasiy mabüs, müstemlekege kelgen soñ, karantinden çıqarılıp, ŞİZOğa avuştırıldı, anda o, pek ağır şaraitte buluna. Bu vaqıt içinde Murasov 72 kg-dan 62 kg-ğa qadar azdı, 10 kg azlaştı", — dep QRM yazdı.
Müstemlekeniñ tutuluv şaraiti ağır olıp qala, dep merkezniñ haberinde qayd etildi: onlarca yıl devamında deñişmegen borularnıñ fevqulâde vaziyeti sebebinden qışta sıq-sıq qızdıruvnen bağlı meseleler peyda ola, kanalizatsiya buzlay.
"Kameralarda kemiricilerniñ sayısı bayağı — sıçanlar siyasiy mabüsniñ şahsiy eşyalarına zarar ketirdi. Rustem Murasov ŞİZOda bulunğanı içün tuvğanlarından haber almaq imkânından marum qaldı", — dep haberde aytıla.
Rustem Murasovnıñ da baş ağrısı ve qan basımı bar, lâkin tibbiy yardım kösterilmesini istese, memuriyet kerekli ilâclar olmağanını ayta.
"Hizb ut-Tahrir davası"nıñ ekinci Aqyar gruppası aqqında ne bilemiz
2021 senesi arman ayınıñ 17-sinde işğal etilgen Qırımda rus quvetçileri, qırımtatarlarnıñ evlerini kütleviy olaraq tintken soñ beş qırımtatar adamını tuttılar: Aqyarnıñ Nahimov rayonından faalci Rustem Murasov ve Rustem Tayirov, Balıqlava rayonından Cebbar Bekirov, Bağçasaray rayonında faalci Zavur Abdullaev ve Aqmescit rayonından Reyif Fevziev.
O zaman Musarov ekinci kere tutuldı. Birinci kere 2016 senesi kiçik ayda tutuldı, amma birazdan azat etildi. Bu sefer ise faalci Rostov-na-Donudaki qırımtatarlarnıñ dava oturışlarından qaytqan soñ tutuldı. Öz halqınıñ temsilcilerini destek etmek maqsadınen o yerge ketti.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
