Saban ayınıñ 2-nci künü Kıyivde keçirilgen iftarda Volodımır Zelenskıy Ukrayina musulman cemiyeti ve qırımtatarlarnıñ kelecek Ramazan ayını barışıqta keçirecegine ümüt etkenini bildirdi.
Suspilne Qırım mühbiri bunı bildirdi.
Saban ayınıñ 2-nde Kıyivde devletniñ birinci şahısları iftarğa toplaştılar. Bundan ğayrı, Ukrayina prezidenti Ukrayina mudafaa quvetlerinde hızmet etken musulman qorçalayıcılarnı devlet mukâfatlarınen taqdirledi.
"Ukrayinanıñ musulman cemiyeti ve qırımtatar halqı 13-nci Ramazannı Rusiye istilâsı, Rusiye ücümleriniñ qıyın şaraitinde qarşılaylar. Kelecek sene Ramazan barışıq olsun, dep isteymiz, ve bunı şimdi telükede olğan, cenkte olğan bütün halqlar içün isteymiz", — dep çıqışta bulunğanda Zelenskıy ayttı.
Qırımtatar halqınıñ lideri Mustafa Cemilevniñ aytqanına köre, işğal etilgen Qırımda qırımtatarlarnıñ 90%-den ziyadesi yarımadanıñ Rusiyeden azat etilmesine ümüt ete.
"Biz işğal etilgen Qırımda vatandaşlarımıznen sıq alâqada bulunamız. Hususan, faalciler ve Qırımtatar Milliy Meclisiniñ vekilleri ile. Ve kerek olğanda, olarnen üçünci memleketlerde körüşemiz. Çeşit menbalardan alğan malümatımızğa köre, vatandaşlarımıznıñ çoqusı, 90 faizden ziyadesi, diger tahminlerge köre ise Qırım tamır halqınıñ 95-96 faizi, Rusiye teşviqatına ve işğalcilerniñ ceza tedbirlerine baqmadan, öz memleketine sadıq qala, Ukrayina Silâlı quvetleriniñ muvafaqiyetleri içün dua ete. Qırımnıñ azat etilmesinden ğayrı — bu halqnıñ kelecegi yoq", — dep Cemilev qayd etti.
Qırımtatar yırcısı Jamala jurnalistlerge Ramazan musulmanlarnıñ ayatında nasıl emiyet taşığanını ve cemiyetni nasıl birleştirgenini tarif etti.
"Bu pek müim bir anane. Qırımda Ramazan ayı başlağanda, mektep talebeleri olaraq orazanı tutqan edik. Bu körüşüvlerniñ temeli edi. Ve bu adet Kıyivde bar. İftar vaqtında, bir yıl devamında körmege planlaştırğan, amma körmegen er kesnen körüşem. Qırımda, Kıyivde iftar içün er vaqıt vaqıt bar", — dep Jamala itiraf etti.
Hatırlatamız ki, kiçik aynıñ 18-nde aqşam maalinde muqaddes Ramazan ayı başlandı. 2026 senesi saban ayınıñ 20-nde, Cuma künü, bitecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
