2021 senesinden berli devam etken işğal etilgen Köktebeldeki yalı kenarınıñ "rekonstruktsiyası" sebebinden plâjlarnıñ çoqusına kiriş yoq.
FortPost işğalli neşiri bunı bildirdi.
"Olarğa yalıñız bir plâj qaldırıldı, em de o plâj şeerniñ ucunda yerleşe. Bazılarınıñ qayd etkenlerine köre, iş yıllarca bütün yalı kenarını qapatmayıp, basamaq şeklinde yapıla bilir edi. Çoqusı içün, başqa iş imkânları olmağanı sebebinden, bu maddiy bir ücüm oldı", — dep haberde aytıla.
Köktebel sakinleriniñ plâjlarğa irişim olmağanından qasevetlengelerini Qırımnıñ reintegratsiya birligi de tasdıqlay.
"Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) "Tereşkova adın plâjı" açılğan soñ, işğalciler onıñ içinde yaldamağa yasaq etkenleri belli oldı. Köktebellilerniñ bilgenlerine köre, aynı yasaq anda da kirsetilecek, qasabanıñ yalı kenarından ğayrı, uzaq yerde yerleşken plâjdan ğayrı, öz plâjları iç bir vaqıt olmağanına baqmadan. Böyleliknen, Köktebel, ğaliba, deñizge çıqmaq imkânı olmağan ilk Qırım şeeridir", — dep birlik mütehassısları qayd eteler.
ARCnıñ haber etkenine köre, işğalciler "rekonstruktsiya"nı bitirüv kününi bir qaç kere başqa künge keçirdiler.
"Keçken yaz sahte "Nazirler şurasınıñ başı" Yuriy Gotsanük başta qurucılıqnı Yañı yılğa qadar bitirmege vade etti, orta küz ayında ise "iş sıñırı"nı nevbetteki yaz mevsiminiñ başlanuvına avuştırdı. Yerli sakinler yazğa qadar "yañı yalı kenarları" olmaycağını añlağanı içün işğalciler "añlaşma müddetiniñ ilk qış ayınıñ 31-ne qadar uzatılğanı"nı ilân ettiler", — dep ARC yazdı.
Hatırlatamız ki, kiçik ayda işğal etilgen Sudaqta yalı kenarınıñ bir qısmı deñizde furtuna neticesinde yıqıldı — anda 2023 senesi şahsiy yatırımcı tarafından abadanlaştıruv işleri yapıldı. Kurort şeeriniñ işğalli "başı" Kiril Çebışev bildirdi ki, tamir işleri yazğa qadar yapılacaq.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
