Kiçik aynıñ 26-nda Qırım işğaline qarşılıq künü Ukrayina prezidenti Volodımır Zelenskıy bildirdi ki, Rusiye cenk içün iç bir mükâfat almamalı, çünki tek onı mesüliyetke çekmek uzun müddetli barışıqnı kefil ete bile. O hatırlattı ki, dünya 12 yıl evel yarımadanıñ işğaline köz yumdı, bu ise Vladimir Putinge daa büyük cenkniñ mümkünligine işanç berdi.
O, Facebook saifesinde bunı bildirdi.
"O vaqıtki liderlerni mitingler ve Qırımdaki narazılıq ve umumen Ukrayinadaki duyğular meraqlandırmadı. Dünya Ukrayinağa susmağa tevsiye etti. İşte, bu sebepten Putinge daa büyük cenk ve Ğarp ile daa sert qarşılıqnı köstere bilecegine inana edi. Şimdi er yıl kiçik aynıñ 26-nda — Qırım işğaline qarşılıq künü — biz bu global dersni hatırlaymız ve Rusiye istilâsına susıp oturmağanlarnı ürmet etemiz. Ve israr etemiz ki, istilâcınıñ cenk içün mesüliyeti — telükesizlik kefaletlerinden biri, devamlı barışıqnıñ eñ küçlü şartlarından biridir", — dep Ukrayina lideri qayd etti.
Zelenskıy halqara ortaqlarına Qırım platformasında iştirak etkeni, Ukrayinanıñ yarımadadaki Rusiye repressiyalarına qarşılıq köstermesinde qol tutqanı ve rus esirliginden ukrayinlerniñ qaytarılmasında yardım etkeni içün teşekkürler bildirdi.
"Rusiyeniñ yarımadada bulunması tek cenkke hızmet ete. Barışıq olmalı, demek ki, Qırım — Ukrayinadır, ve dünya bunı deñişmez şekilde tanımaq kerek. Qırım evine qaytmalıdır! Ukrayinağa şan-şerefler!" — dep qayd etti o.
Hatırlatamız ki, kiçik aynıñ 26-nda Ukrayinada Qırımnıñ Rusiye işğaline qarşılıq künü qayd etile. 2014 senesi aynı şu künü Simferopolda (AqmesciRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adtte) ukrayin ve qırımtatar timsallerinen biñlernen insan yarımadanıñ Rusiye tarafından zapt etilmesine qarşı narazılıq bildirmek içün muhtariyet parlamentiniñ divarları ögünde toplaştı.
Moskvanıñ adise-vaqialarnı "Qırım sakinleriniñ serbest saylavları" olaraq köstermege tırışqanına baqmadan, içtimaiy malümat ve şaatlarnıñ şaatlıqları Qırımdaki Rusiye tarafdarı olğan çoqluq aqqında efsaneni red ete — bu aqqında tafsilâtlıca Suspilne Qırım bildire.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
