Ukrayina vaqtınca işğal etilgen topraqlarda siyaset çerçivesini azırlay, Qırımnen bağlı halqara işni devam ete ve yarımada vatandaşlarından muracaatlarnıñ artqanını qayd ete.
Ükümet, Tış işler nazirligi ve Ukrayina prezidentiniñ Qırım Muhtar Cumhuriyetindeki temsilciligi İşğalge qarşılıq kününe bağışlanğan "Qırım: küreşkenimiz ev" forumında bunı beyan ettiler.
Cemiyetler ve topraqlar inkişafı naziriniñ muavini Oleksiy Râbıkin bildirdi ki, ükümet vaqtınca işğal etilgen topraqlarğa nisbeten devlet siyasetiniñ esas printsiplerini belgileycek qarar azırlay.
"Bu, devletniñ ve akimiyetniñ çeşit seviyedeki organlarınıñ vaqtınca işğal etilgen topraqlar siyaseti yönelişinde areketleri içün belli bir çerçiveni teşkil etken pek müim, esas vesiqa ola. O, gumanitar, içtimaiy, demografik ve diger saalarnı qaplay. Asılında, devletniñ insanlarnen iş tutmaq ve kelecekte reintegratsiyağa azırlanmaq içün yanaşuvlarını tertip etüv aqqında söz kete", — dep o bildirdi.
Memur insanlarnıñ işğalden qaytması içün şaraitni yaratmaq kerekligini qayd etti.
"Vaqtınca işğal etilgen topraqlarda devletniñ bulunuvını temin etmek kerekmiz, anda yaşağan Ukrayina vatandaşlarınen bağnı temin etmek kerekmiz. İnsanlarnıñ Qırımdan qaytması içün bütün manialarnı, em memuriy, em de protsedural manialarnı yoq etmek kerek. İnsanlar añlamaq kerekler ki, çıqqan soñ olar meselelernen yalıñız qalmaycaq, olarğa destek ve integratsiya mehanizmleri berilecek", — dep Râbıkin ayttı.
Memurnıñ aytqanına köre, balalar ve gençlernen çalışmağa ve işğalden soñ insanlarnıñ qaytması içün şaraitniñ yaratılmasına ayrı diqqat ayırıla.
Qırım meselesiniñ halqara emiyeti aqqında tış işler naziriniñ muavini Yevhen Perebıynis ayttı. Onıñ qayd etkenine köre, Rusiyeniñ Qırım mevzusını dünya kün tertibinden çıqarmaq ıntıluvlarına baqmadan, bu muvafaqiyetsiz oldı.
"Qırım halqara teşkilâtlarnıñ ve ortaq devletlerniñ kün tertibinde qala. Bu, ilhaq ıntıluvını tanımama aqqında mütenasip qararlar ve siyasiy beyanatlarınen tasdıqlana. Rusiye öz areketlerini halqara seviyede qanuniyleştiremedi", — dep diplomat qayd etti.
Onıñ aytqanına köre, Ukrayina halqara meydançıqlarnı insan aqları bozuluvı ve bölgeniñ demografik terkibini deñiştirüv siyasetini qayd etmek içün qullanmağa devam etecek.
Ukrayina prezidentiniñ Qırım Muhtar Cumhuriyetindeki daimiy temsilcisi Olğa Kurışko vaqtınca işğal etilgen topraqlardan kelgen vatandaşlarnıñ muracaat sayısı artqanını bildirdi.
"İşğal etilgen topraqlardan kelgen insanlarnıñ muracaatları arttı — keçken senege baqqanda, aman-aman biñge arttı. Bu, malümat ve hususiy hızmetler içün muracaat bar olğanını köstere. İnsanlar ukraiyn akimiyet organlarınen işbirlik mehanizmlerini qıdıralar", — dep o ayttı.
Aynı zamanda, onıñ aytqanına köre, telükesizlik komponenti kommunikatsiyağa pek tesir ete.
"Şimdi kommunikatsiyamıznıñ diqqatını diger memleketlerniñ topraqlarına çeviremiz, anda insanlar keteler. Olarnıñ çoqusı, Qırımda qalğan soy-sopları içün telükeler bar olğanı sebebinden, halq ögünde çıqmağa azır degil. Şunıñ içün bizim vazifemiz — telükesiz bağ kanallarını temin etmek ve qoşma telükelersiz yardım almaq imkânını temin etmek", — dep Kurışko qayd etti.
Onıñ aytqanına köre, temsilcilik kommunikatsiyanıñ diqqatını deñiştire ve vatandaşlarnen üçünci memleketler üzerinden daa faal çalışa, çünki vaqtınca işğal etilgen topraqlardan çoqusı bu yolnen kete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
