Berlinde kiçik aynıñ 24-nde, Rusiye istilâsınıñ dörtünci yıllığında, biñlernen insan Ukrayinağa qoltutuv mitingine çıqtı. Aktsiya iştirakçileri Rusiye esirliginde tutulğan siyasiy mabüslerni, şu cümleden Qırımdan olğanlarnı hatırlattılar.
Kiçik aynıñ 25-nde Qırımtatar resurs merkezi (QRM) bu aqqında haber etti.
Teşkilâtçılarnıñ tahminlerine köre, mitingde 12 biñ insan iştirak etti. Belli ukraiynler arasında aktsiyağa Qırımtatar Milliy Meclisiniñ reisi Refat Çubarov, QRMniñ reisi Eskender Bariev, ZMINA insan aqları merkeziniñ reisi Tetâna Peçonçik, em de sabıq siyasiy mabüs, qırımtatar Leniye Umerova qoşuldı.
Miting iştirakçileri, hususan, İrına Danılovıç, Appaz Kurtametov, Boğdan Ziza kibi Qırım siyasiy mabüslerini, Herson vilâyetiniñ siyasiy mabüsi Anna Yeltsova ve Melitopoldan siyasiy mabüs Kostântın Zinovkinni hatırladılar.
"Bir çoq yarıq insan keldi — ve er yerde bayraqlar bar edi: ukrayin, gürci, qırımtatar. Bu ağır cenk devam etken vaqıtta, biñlernen ukrayinler alâ daa Rusiye esirligindedir — bizler azat etilmek kerek olğanlarnı hatırlatamız. Çetelden kelgen ukrayinalılarğa ve bağışlamağa, mitinglerge çıqmağa ve Ukrayinağa qol tutmağa devam etken er keske teşekkürlerimni bildirem", — dep Peçonçık Facebook saifesinde bildirildi.
Bundan ğayrı, kiçik aynıñ 24-nde Ankarada cenk esirleri ve ğayıp olğan ukrayinlerniñ qorantaları, şu cümleden Türkiyedeki Ukrayina elçisi, sabıq siyasiy mabüs Nariman Celâl da aktsiya keçirdi. Olar dünya toplulığını Rusiye ve Ukrayina arasında esirlerniñ deñiştirlmesini tezleştirmege çağırdılar.
Bundan evel Avropanıñ farqlı şeerlerinde Ukrayinağa qoltutuv aktsiyaları olıp keçti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
