Meclis reisi Refat Çubarov ve Meclis azası Eskender Barievden ibaret olğan Qırımtatar Milliy Meclisiniñ eyyeti Almaniyada iş ziyaretinen buluna.
Refat Çubarov, eyyetniñ Ukrayinağa qol tutuv ve Rusiye istilâsına qarşılıq kösterüv meselelerine bağışlanğan halqara forumnıñ işine qatnağanını Suspilne Qırımğa bildirdi.
Berlinde er yıl "Kıyiv KP" adlı halqara forum olıp keçe. O, 12 zaldan ibaret olğan büyük kinoteatrda bir kün devamında keçirile ve biñlernen iştirakçini — farqlı memleketlerniñ siyasetçileri, Almaniya Federativ Cumhuriyetiniñ reberligi, mütehassıslarnı — toplay. Farqlı formatlarda çeşit panellerde Ukrayina devletine qoltutuv, cenk ve Rusiye istilâsı meseleleri muzakere etile. Bularnıñ episi aynı vaqıtta, bir qaç yerde, amma bir yerniñ içinde keçe", — dep Refat Çubarov tarif etti.
Onıñ sözlerine köre, forumnıñ açılışı Almaniya kantsleri iştirakinen olıp keçti, muzakerelerniñ bir qısmı ise Qırım ve Ukrayina tamır halqlarına bağışlandı.
"Qırımğa bağışlanğan bir sıra panel bar edi. Biz, Qırımtatar Milliy Meclisiniñ eyyeti, Ukrayina tamır halqlarınıñ meseleleri, Avropa kelecegine qoşqan issesi muzakere etilgen panelde iştirak etti. Ukrayina milliy azlıqları aqqında laf ettik. Men bellesem, bizim panelimizge kelgenler içün meraqlı edi", — dep o bildirdi.
Bundan ğayrı, eyyet qırımtatar mirasınıñ artefaktları saqlanğan Berlin Avropa medeniyet müzeyi reberliginen körüşüvni planlaştıra.
"Bugün, kiçik aynıñ 24-nde, Berlinde Avropa medeniyeti müzeyiniñ reberlerinen körüşüvimiz olacaq. Bu, qırımtatar medeniyetiniñ tahminen 600 artefaktı saqlanğan müzeydir. Bu pek acayip bir şey. 1920 seneleri, Birinci ve Ekinci cian cenkleri arasında, Qırımda alman ekspeditsiyası çalışa edi. O, qanuniy şekilde, o vaqıtki akimiyetten izin alıp çalıştı", — dep Çubarov qayd etti.
Bundan ğayrı, kiçik aynıñ 24-de eyyet Bundestag tedbirlerinde ve Berlin merkezinde birdemlik aktsiyasında iştirak etecek.
"Bundestagda saat 15-te Ukrayina elçisi Oleksiy Makeyev ve ukrayin cemiyetiniñ vekilleriniñ iştirak etecekleri serginiñ açılışı olacaq. Saat 18-de Brandenburg qapısına yürüş olacaq ve anda aqşam saat 19-da miting olacaq, onı Almaniyadaki ukrayin diasporası teşkil ete", — dep Refat Çubarov qayd etti.
Ziyaret çerçivesinde ukrayin ve qırımtatar diasporasınıñ temsilcilerinen körüşüvler planlaştırıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
