Kıyivli tilşınas Oleksandr Kostük, Rusiye arbiy hızmetçileri tarafından tolu miqyaslı istilânıñ başında hırsızlanğan edi, aman-aman dört yıldan berli mahkeme ve resmiy qabaatlavsız tutula. Al-azırda o, işğal etilgen Qırımdaki Simfefropolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) 2-nci SİZOda inkommunikado statusında buluna.
Qırımtatar Resurs Merkeziniñ idarecisi Zarema Barieva bunı bildirdi.
"Tolu miqyaslı arbiy istilâ başlağanda Kostük Oleksandr Oleksandrovıç Poloniyada, logistika şirketlerinden birinde çalışa edi. O vaqıt apayı eki küçük qızınen Kıyivde edi. Ayapınıñ Ukrayinağa qaytmamağa ricasına baqmadan, adam evge, şu künleri rusiyeliler 3 künde almağa tüşüngen paytahtqa qaytmağa qarar ala", — dep QRMniñ idarecisi qayd etti.
Onıñ aytqanına köre, Oleksandr Kıyivge 2022 senesi saban ayınıñ 27-nde keldi. Bu arada onıñ apayı Marına qızları ile beraber Borodânka civarındaki köyge ketti, anda qoranta cenk areketleriniñ merkezine tüşti. Adamnen bağ yoq edi. Marına balalarınen beraber tek çeçek ayınıñ 9-nda işğalden çıqıp oldı.
"İşğalden çıqqan soñ, qadın, aqayı Oleksandr Poloniyadan Kıyivge kelgen soñ, insanlarnı tahliye etüv boyunca göñülli faaliyetke faal qoşulğanını ve özü de insanlarnı tahliye etmek kerek olğan Dzerkalka köyünde esirlikke tüşkenini, onıñ yerine ise yol ortasından hırsızlanğanını ve belli olmağan yönelişte Rusiye arbiy hızmetçileri tarafından BTRge alıp ketilgenini ögrene", — dep Barieva yazdı.
Oleksandr Kostük Taras Şevçenko adına Kıyiv milliy universitetiniñ filologiya fakultetiniñ türk filologiyası kafedrasınıñ mezunıdır. Soy-sopları onıñ bulunğan yerini ögrenmege tırıştılar.
"2022 senesi çeçek ayınıñ 19-nda ilk arbiy esir deñişimlerinden soñ, Belgorod vilâyetiniñ Starıy Oskol şeerinde Kostüknen bir kamerada bulunğan azat etilgenlerden biriniñ sözlerinden, onıñ tutulması ve o vaqıt Rusiyede bulunğan yeri aqqında belli oldı", — dep Zarema Barieva qayd etti.
QRMniñ malümatına köre, adamnı tahminen on kün devamında alıp ketkenler, soñra onı Starıy Oskol şeeriniñ 2-nci SİZOda, soñra — Valuyki şeeriniñ müstemlekesinde qaldırdılar. 2023 senesi ilk küz ayında Marına onıñ Kursktaki 1-nci SİZOğa avuştırılğanını ögrene, anda o 2024 senesi arman ayına qadar qala. Kursk vilâyetinde faal cenk areketleri başlağan soñ, onıñ aqqında malümat yoq oldı. Keçenlerde QRM Oleksandrnıñ Simferopoldaki (Aqmescitteki — terciman) 2-nci SİZOda tutulğanı aqqında eksklüziv malümat aldı.
Uquq qorçalayıcı qayd etti ki, aman-aman dört yıl devamında Kıyivli tılşınas mahkeme, tahqiqat ve resmiy qabaatlav statusı olmadan tutula.
"Men alâ daa 2022 senesi, er şey qara ve beyaz olğan yerde qaldım. Tek biz, Oleksandr ve balalarımızğa baqıp, vaqıtnıñ bir yerde turmağanını körem. Amma, eñ çoq arzu etkenim, aqayım Oleksandrnıñ ve Rusiye tarafından azatlıqtan marum etilgen çeşit yerlerde qanunsız tutulğan bütün Ukrayina vatandaşlarınıñ azat etilmesi, çünki esirlik tek esirlerni degil de, olarnıñ aile azalarını da öldüre", — dep Marına ayttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
