İşğal etilgen Qırımda suv yedekleri suvarılmaq içün yeterli degil. İşğalden evel yarımadada 160 biñ suvarılğan topraq olsa da, şimdi tek 20 biñ bar.
İşğalli Qırım köy hocalığı naziri Denis Kratükke atfı etip, "Kaffanews" işğalli neşiri bunı bildirdi.
"Televizor ve radiolardan çoq suvumız bar olğanı ve qar çoq yağğanı eşitile, — dep Qırım köy hocalığı naziri Denis Kratük qayd etti. — Bu sene yağanaqlardan suvnıñ optimal miqdarını aldıq, dep ayta bilem, ve büyük plüs beklenilmey. Belli olğanı kibi, suv yapma göllerine dağlıq yerlerden kele edi. Amma suv yedekleri arqasında Lenin, Kirov ve, şaşırtıcı bir şekilde, Qara deñiz rayonları lider ola. Bizim anbarlarımızda — Krasnogvardiya, Pervomaysk ve Saq rayonlarında — metr qatında nem yoq. Ukrayina vaqtında Qırımda 160 biñ gektar suvarılğan topraq bar edi, şimdi ondan bir qısmı suvarıla", — dep haberde qayd etildi.
Qırım reintegratsiyası birleşmesiniñ mütehassısları, Kratükniñ aytqanlarını bu agrar mevsiminiñ yaramay tahminlerinen bağlı olğanını sayalar.
Hatırlatamız ki, işğalcilerniñ Qırımğa Özü suvunıñ berilmesinen bağlı kerçek planları yoq, ve olar bu mevzunı "uzun müddetli inkişaf strategiyaları"na bile kirsetmeyler. Kratükniñ "beklenilmegen açıqlamaları"nıñ ise adiy bir añlatması bar — işğal etilgen yarımadada şimdiki ziraat mevsimi nevbetteki "menfiy muvafaqiyetler"ni kösterecek, bu sebepten bu erbap qabaatlılarnı "aqıllı şekilde" evelden qıdırmağa başladı", — dep haberde bildirildi.
Hatırlatamız ki, Qırım nazirler şurasınıñ işğalli reisi Yuriy Gotsanük Qırım yapma göllerinde tahminen 153 million kubometr suv toplanğanını beyan etti. Bu, ealiniñ suvnen teminatını 360-380 kün devamında teminleycek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
