İşğal etilgen Qırımda ecnebiy tillerde yazılğan tahminen beş yüz levha — umumen levhalarnıñ yarısı deñiştirildi. Saban ayınıñ 1-nden başlap, Rusiye Federatsiyasınıñ "Rus tiliniñ qoruvı aqqında" qanunı işke tüşürilip başladı, o, açıq levhalarda malümatnı yalıñız rus tilinde yazmağa mecbur ete, riayet etilmegenlerge ise para cezası berilir.
İşğalli "Qırım parlamenti"niñ reisi Vladimir Konstantinov öz Telegramında levhalarnı deñiştirüv işiniñ neticeleri aqqında yazdı.
"Qırımda ecnebiy tillerde yazılğan 500 reklama levhasınıñ rus tiline deñiştirildi. Bu ise, deñiştirilmek kerek olğan reklama levhalarınıñ aman-aman yarısıdır. Bu ğayeviy müim işni devam etecekmiz ve "Qırım — Kiril territoriyası" cumhuriyetiniñ mimarcılıq-bediy üslübini işlep çıqarmaq içün leyhanı muzakere etmege teklif etemiz", — dep haberde qayd etildi.
2025 senesi boş ayda Konstantinovnıñ Telegramında yazğanına köre, yarımadada bu iş devam ete ve bazı şeer ve rayonlarda böyle yazılarnı deñiştirdiler. Amma şimdi işğalli memurlarnıñ bildirgenine köre, levhalarnıñ yalıñız yarısı deñiştirildi.
Hatırlatamız ki, "Rus tiliniñ qoruvı aqqında" Rusiye qanunına binaen, 2026 senesi saban ayınıñ 1-nden başlap, Rusiye Federatsiyasında ve işğal etilgen topraqlarda qullanıcılar içün bütün malümat rus tilinde derc etilmeli.
2025 senesi Qırımda işğalciler "Büyük rus sözü" festivalini teşkil ettiler, o, ingliz tillinde yazılğan adlardan ve latin urufatından vazgeçüv teşviqatı içün meydançıq oldı. İlk yaz ayınıñ 3-12 künleri keçirilgen tedbirde işğalli Rusiye memurları ve Rusiye tarafdarları yarımadanı Ğarptan tilnen ayırılmaq ğayelerini ilerilediler. Qırım uquq qorçalayıcılarından biri anonimlik şartınen bu aqqında Suspilnege haber etti.
Festivalniñ açılışı munasebetinen Qırımnıñ Rusiye işğalşi akimiyeti "Rus tili — bizim ğururımız" adlı broşürni çıqardı. Vladimir Konstantinovnıñ aytqanına köre, ingliz tilinde qullanılğan ıstılalarnı tüşüncesiz qabul etüv ve sleng qullanuvı rus tiliniñ yoq etilmesine ketire.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
