İşğal etilgen Qırımdaki benzin stantsiyalarından A95 benzini yoq oldı. Yarımadaki ve Rusiyeniñ yaqarlıq astyapısına qarşı USQniñ ücümlerinden soñ teminatnen bağlı meseleler başlandı.
Radio Svobodanıñ "Qırım.Aqiqat" leyhası, #LiberateCrimea halqara kampaniyasınıñ faalcisine atfı etip, bunı bildirdi.
"USQniñ istilâcı memleketniñ yaqarlıq obyektlerine sistematik ücümleri devamlı neticeler bere — Qırımda benzin yedekleri yoq, benzin stantsiyalarında benzinniñ olması qomşu Rusiyeden er kün ketirilmesine bağlı. Belli bir benzin markası yoqsa, demek ki, USQniñ Qırım ya da Krasnodar ülkesinde yaqarlıq astyapılarına ücümleri muvafaqiyetli oldı", — dep faalci tarif etti.
Hatırlatamız ki, kiçik aynıñ 16-na keçer gecesi Ukrayina mudafaa quvetleri işğal etilgen Qırımda "Pantsir-S1" raketa-top kompleksini urdı. Kiçik aynıñ 15-nde Facebookta USQniñ Baş ştabı bu aqqında haber etti.
Aynı şu künü Baş ştab, Krasnodar ülkesiniñ Volna köyü civarındaki "Tamanneftegaz" neft terminalınıñ zarar körgenine dair haber aldı.
Yarımadada benzinniñ kesilüvi ilk sefer degil. Hususan, 2025 senesiniñ küzünde, yaqarlıq qıtlığı sebebinden, acele yardım maşnalarınıñ çıqışı sıñırlandı. İnsanlarğa hastahanelerge öz başına barmağa tevsiye etile, dep Milliy muqavemet merkezi bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
