İşğal etilgen Qırımda muallimler qıtlığı bar — 280 fizika ve riyaziyat ocaları ve bala bağçalarında 573 ögreticisi yetmey. Em de bala ruhiyatçıları, içtimaiy hadimler ve tilşınaslar içün boş yerler bar.
İşğalli Qırım "tasil, ilim ve gençlik nazirligi" Valentina Lavrik matbuat konferentsiyası vaqtında bunı bildirdi.
"Biz balalar içün mektepler azırlağan edik, lâkin tasil bericilerni azırlamadıq. Qırım mekteplerinde 280 fizika ve riyaziyat ocaları yetmey. Em de ruhiyatçılar, içtimaiy hadimler ve tilşınaslar az. Bala bağçalarında ögreticilerniñ azlığı bar — 573 kişi", — dep Lavrik bildirdi.
İşğalli "nazir" şunı da bildirdi ki, şimdi işğal etilgen Qırımda 533 mektep ve 464 bala bağçası çalışa, olarda 300 biñ bala oquy.
Teñeştirmek içün, 2013 senesi Qırımda 660 mektep bar edi.
Bundan evel Qırım ukrayinleri rayon şurasınıñ vekili Andriy Şçekun "Suspilne studiya" canlı yayınında Rusiye işğal etilgen yarımadada 600-den ziyade ukrayin sınıfını ve 7 mektebini yoq etkenini ayttı.
"Bugünge qadar bizler ukrayinlerge qarşı siyaset alıp barğan işğalli nazirlerniñ muavini ve tasil nazirlerine qarşı cinaiy dava açılması aqqında sekiz ariza berdik. Bu cedveller daa toldurılacaqtır, çünki qabaatlılar daa çoq", — dep Qırım ukrayinleri rayon şurasınıñ vekili qayd etti.
Keçenlerde "Sarı şerit" areketiniñ iştirakçileri işğal etilgen Qırım mekteplerinde Ukrayinağa qarşı cenk iştirakçilerinden pedagogik tasil almağan "muallimler" peyda olğanını bildirdiler.
"Cebeden qaytqan soñ, olarnı, iç bir türlü tasil olmağanlarına baqmadan, oquv yurtlarına işke alalar. "Sarı şerit" areketiniñ Simferopollı (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adli — terciman) faalcileri bildirdiler ki, böyle "ocalar"dan biri derslerde balalarğa öz cenk tecribesi aqqında tarif ete ve "cenk sevgisi" aqqında añlata. Yarımadada tasil arbiy teşviqatnıñ aletine çevirile", — dep "Sarı şerit" yazdı.
Daa evel Suspilne Qırım işğal etilgen Qırımda tibbiyet vaziyeti, hususan bu saada hadimler qıtlığı aqqında tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
