2014 senesi Qırımnıñ işğali vaqtından berli Rusiye Federatsiyası ukrain tasilini mahsus maqsatnen yoq ete, devlet tilinde oquvnı yoq ete ve rus standartlarını kirsete. Böyle bir siyasetniñ neticesi olaraq yarımadada faal sürette yapılğan tarih ve teşviqat yañartılması ola.
Bunı Prezidentniñ Qırım Muhtar Cumhuriyetindeki Temsilcisiniñ muavini Denıs Çıstikov "İşğal etilgen Qırımda devlet tilinde tasil aqqınıñ bozuluvı" mevzusında tögerek masa devamında bildirdi.
"Ukrain tili ve medeniyeti yarımadanıñ tasil alanından çıqarıldı. Tarihnı bozmaq ve istilâcı devletke sadıqlıqnı şekillendirmek içün işğalli akimiyet tasilni qullana", — dep qayd etti Denıs Çıstikov.
Çıstikovnıñ aytqanına köre, işğalli akimiyet tek oquv programmalarınıñ mündercesini deñiştirmey, aynı zamanda Ukrainağa qarşı menfiy munasebet ve militarizmni terbiyelemek içün teşebbüslerni de amelge keçire.
"Rusiye, Ukraina ve qırımtatar halqınıñ tarihı yoq etilgen ve Rusiyeniñ Qırımdaki rolü bozulğan Qırım sakinleri içün alternativ kerçekni yaratmağa tırışa", — dep Çıstikov qayd etti.
Devlet tilini qoruv vekâletlisi Taras Kreminniñ sözlerine köre, Qırımda til öldürüv adiseleri qayd etile ve halqara makemelerge berile.
"Bu yalıñız Cinaiy-protsessual kodeksiniñ 161-inci maddesi degil, bu til alâmetine köre ayırımdır, bu Ukraina vatandaşlarınıñ til aqlarınıñ bozuluvı içün muayyen cezalardır, bu halqara makeme müessiseleri içün ğayet müim bir delil ola. İşğal vaqtında bizim müessisemizniñ toplağanı malümatlar AİAMAvropa İnsan aqları makemeside ve Halqara cinaiy makemede baqıldı", — dep qayd etti o.
Ukraina ortodoks kilsesiniñ vekili Andriy Şçekun Suspile. Studiyanıñ canlı yayınında Rusiyeniñ zararlı tasil siyasetiniñ miqyasını qayd etti.
"2014 senesinden berli Qırımda 600 ukrain sınıfı ve 7 mektep yoq etildi. Ukrain tasili, medeniy merkezleri kibi, yoq etildi. Bu cinayetlerni tasdıqlağan eki esas halqara qararımız bar", — dep Şçekun bildirdi.
O, bozuluvlarnıñ miqdarını da qayd etti.
"Bugünge qadar bizler ukrainlerge qarşı siyaset alıp barğan işğal nazirleriniñ muavini ve tasil nazirlerine qarşı cinaiy dava açılması aqqında sekiz ariza berdik. Bu cedveller kene de toldurılacaq, çünki qabaatlılar daa çoq", — dep Ukraina ortodoks kilsesiniñ vekili qayd etti.
Telegram, WhatsApp ve Facebookta Suspilne Qırım haberlerine abune oluñız
