WhatsApp messenceriniñ memuriyeti, Rusiye akimiyetiniñ insanlarnı nezaretden qorçalanmağan Rusiye devletiniñ Max qullanmasına keçmege mecbur etmek içün WhatsAppnı bütünley blok etmege tırışqanını bildirdi.
Kiçik aynıñ 12-nde şirket, X saifesinde bu aqqında haber etti.
"100 milliondan ziyade qullanıcını şahsiy ve telükesiz bağ aqqından marum etip, izolâtsiya etmege tırışmaq — Rusiyede adamlarnıñ telükesizliginiñ eksilmesine ketire bilecek bir adımdır. Qullanıcılar bağda qalsın dep, elimizden kelgenini yapmağa devam etemiz", — dep qoştı.
Bundan evel Rusiye kütleviy haber vastaları, Roskomnadzor hızmetiniñ domen adlarını DNS-serverlerinden silgenini yazdı. Şimdi bu uyğulamağa irişim domen sistemasınıñ temel seviyesinde blok etildi. Bu ise, platformanı içtimaiy aletlersiz qullanmağa imkânsız yapa.
2025 senesiniñ başından Rusiye, MAX devlet messencerini kütleviy şekilde teşviq etmege başladı. İlk küz ayınıñ başında onıñ auditoriyası 30 million qullanıcıdan çoq edi, dep şirketniñ matbuat hızmeti bildirdi.
İlk baqışta bu, sıradan bir messencerdir, amma, raqamlı havfsızlıq mütehassısı Pavlo Belousovnıñ aytqanına köre, MAX Rusiyede ve onıñ tarafından işğal etilgen topraqlarda bütünley nezaret etüv aleti oldı.
İşğal etilgen yarımadada Suspilne Qırım menbalarından alınğan malümatqa köre, bu Rusiye messencerini mektep, universitet, devlet müessiselerinde endirmege mecbur eteler, başqa çaresi qalmay. İşğalli akimiyet Qırım sakinlerini telefonlarına MAX endirmege nasıl zorlağanı, bu ne qadar telükeli olğanı ve "telefondaki casus"dan nasıl qorçalanmaq mümkün olğanı aqqında maqalemizde oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
