"Diversantlar devası" çerçivesinde mahküm etilgen ve endi doquz yıldır apiste yatqan Qırım sakini Volodımır Dudkanıñ sağlıq alı pek fenalaşıp tura.
Qırım uquq qorçalayıcı gruppası bu aqqında haber berdi.
Volodımır Dudkanıñ aqrabalarınıñ bildirgenlerine köre, müstemlekede kerekli tibbiy yardım olmağanı sebebinden onıñ sağlıq alı fenalaşıp tura.
Olarnıñ sözlerine köre, Dudkanıñ bir qaç hronik hastalığı bar. Onı gipertoniya, sıq baş ağrıları, bedendeki eşken, mide ağrıları ve prostatitniñ kerginleşmesi raatsızlata.
Uquq qorçalayıcılar qayd ettiler ki, Volodımır aqrabalarnıñ bergenleri ilâçlarnı almaq mecbur, öz-özüni tedaviyley, çünki müstemlekeniñ memuriyeti oña kerekli tibbiy yardım köstermey.
Hatırlatamız ki, Volodımır Dudka apiske alınmadan evel Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) FVDHde çalışa edi. Onıñ qardaşı Petro Suspilne Qırımğa añlattı ki, şimdi onıñ ciddiy sağlıq meseleleri bar.
“Rus bayramları arfesinde Volodımırnı sıq sıq ceza izolâtorına qapatalar. Onıñ gipertoniyası, mide ülseri, prostatiti bar. Amma tedaviylev yerine izolâtsiya”, — dep qardaşı ayttı.
Qanunsız ükümlerge köre, Dudka daa beş yıl apiste keçirecek. Faqat onıñ yaqınları, onıñ daa erte, kelecek deñiştirüvlerden biri vaqtında, evge qaytacağına ümüt eteler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
