2+2 telekanalı, 2016 senesi işğal etilgen yarımadada Ukrayina Mudafaa nazirliginiñ Baş istihbarat idaresiniñ reydiniñ tafsilâtlarını ilk sefer aydınlatqan "Qırımda gizli operatsiya" vesiqalı filmini taqdim etti. Kütleviy haber vastaları Kırılo Budanovnıñ bu ameliyatqa azırlanuvı aqqında video çıqardı. O, Ukrayina mustaqilligini qazanğan soñ Rusiyege qarşı yapılğan ilk aktsiya oldı.
Kiçik aynıñ 10-nda telekanal YouTube kanalında bu videonı derc etti.
O vaqıt prezident ofisiniñ şimdiki yolbaşçısı Kırılo Budanov, Canköy rayonında Rusiye ücüm vertolötları ve zemaneviy AMSnı urmaq vazifesini alğan gruppanıñ yolbaşçısı edi. Onıñ aytqanına köre, ameliyatnıñ esas neticesi tek arbiy zarar degil de, siyasiy tesir de oldı:
"Onıñ büyük siyasiy tesiri bar edi. Bu eñ müimi. O vaqıt er kes Qırımnı ğayıp etmege razı oldı ve onı unuttı, atta aytmağa bile toqtadı. Bu operatsiyadan soñ Qırım meselesi peyda oldı. Bu onı canlandırdı".
Budanovnıñ azırlanmasınıñ temeli, er bir askerge şahsiy işanç ve diqqatlı planlaştıruvdan ibaret edi.
"O telefon etti, ve bizni, soñra patlatılğan Chevrolet maşnasında körüştik. Oturdıq, laf ettik. "Qırımğa kirmege istemeysiñmi?" dep soradı. Men de: "Ebet", — dep cevap berdim", — dep reyd iştirakçilerinden biri hatırladı.
Başqa bir asker azırlıq seviyesini qayd etti:
"Er şey öyle yapıldı ki,ameliyatqa çıqqan soñ emin edik: gruppa ava limanına kirse, er şey muvafaqiyetli olur. Ne yerge yerleştirmek, nasıl yerleştirmek, telükesizlik nasıl çalışa, nasıl qıyınlıqlarğa rastkelmek mümkün ve ilâhre", — dep qayd etti o.
Vesiqalı filmde Budanovnıñ qıyın vazifeler ögünde yapqan hususiy adetleri de kösterile.
"Kırılo Oleksiyovıçnıñ küçük bir ananesi bar. Qıyın vazifeniñ ögünde o, Arey Qılıcı yırını diñley, ve er bir iştirakçi rom içmek kerek. Adetler öz devamlılığınen qıymetlidir. Bütün bu ananeler yıllarnen saqlanıp qaldı — kimse olarnı iç bir vaqıt deñiştirmez", — dep ameliyat iştirakçilerinden biri hatırladı.
Eki qardaşnıñ aytqanına köre, muvafaqiyetniñ esas sebebi — bir-birine olğan işançtır.
Operatsiya faktı aydınlatılğanına baqmadan, FSB "Vimpel" elit bölügi ukrayin istihbaratçılarını tutıp olamadı. Bütün askerler yarasız qayttılar, eki FSB hadimi yaralandı ve "Vimpel" polkovnik-leytenantı Roman Kamenyev yoq etildi.
"Bu, bir çoq hadimniñ moralini bayağı köterdi", — dep Bİİniñ sabıq yolbaşçısı ayttı.
Onıñ aytqanına köre, kösterilgeni kibi Rusiye ve onıñ "elit bölükleri" ğalebe qazanmaz.
Film müellifleriniñ malümatına köre, elâk olğan Rusiye bölüginiñ komandanı Vladimir Putinge yaqın olğan itibarlı şahısnıñ oğlu edi. Bundan soñ, olarnıñ aytqanına köre, Rusiye diktatorı Qırımdaki ameliyatqa alâqası olğan er kesni yoq etmege söz berdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
