Ukrayina uquq qoruyıcıları Rusiye Federatsiyası Apellâtsiya arbiy mahkemesiniñ üç mahkemecisine şübelerini ğıyabiy şekilde bildirdiler. Olar Ukrayina Mudafaa nazirliginiñ Baş istihbarat idaresiniñ esir askeriniñ şikâyet arizasını baqıp, onıñ çoq yıllıq apis cezasını tasdıqladılar.
Kiçik aynıñ 10-nda Ukraiyna havfsızlıq hızmetiniñ Qırım Muhtar Cumhuriyetindeki baş idaresi Facebookta bu aqqında haber etti.
Ukrayina Ceza qanunnamesiniñ 28-inci maddesiniñ 2-nci qısmı, 438-inci maddesiniñ 2-nci qısmına istinaden — cenk cinayetleri, şahıslar gruppası tarafından evelden yapılğan añlaşma, hususan 12.08.1949 senesi doğğan cenk esirlerinen munasebet aqqında şartnameniñ 129 ve 130-ıncı maddeleriniñ bozuluvı boyunca şübheli olaraq ilân etildi. Olar 12 yılğa qadar apis cezasını ala bileler.
Havfsızlıq hızmeti şübhelilerniñ adlarını aytmadı, lâkin Suspilne Qırımnıñ menbaları, Serğiy Butusov, Oleksandr Çepurenko ve Anatoliy Kostenko adlarını bildirdiler.
Bİİniñ arbiy hızmetçisi 2023 senesi orta küz ayında işğal etilgen Qırımnıñ yalısında arbiy vazifeni eda etkende Rusiye esirine tüşti.
Birinci instantsiya mahkemesi onı sert rejimli müstemlekede 20 yılğa üküm etti.
"Taqiqatnıñ malümatına köre, 2024 senesi ilk qış ayında şübheliler mahkemecilerniñ kollegiyasında Ukrayina Mudafaa nazirliginiñ Bİİniñ arbiy hızmetçisini vaqtınca işğal etilgen Qırım toprağında "terroristik faaliyet"te qabaatladı ve 19 yıl 11 aylıq apis cezasını berd", — dep QMC prokurorlığı bildirdi.
O qoştı ki, cenk esirlerinen munasebet aqqında Jeneva şartnamesiniñ qaidelerine zıt kele.
Daa evel Ukrayina baş prokurorı Ruslan Kravçenko bildirdi ki, Ukrayina mahkemesi Qırımdaki işğalli mahkemecini 15 yılğa azatlıqtan marum etip, mal-mülküni musadere etti. Onıñ aytqanına köre, mahküm etilgen "mahkemeci" ukrayin arbiy hızmetçileriniñ apis etilmesi, ukrayin tarafdarı olğan faalciler ve jurnalistlerniñ, şu cümleden qırımtatar faalcisi, sabıq siyasiy mabüs Edem Bekirovnıñ taqip etilmesi aqqında qarar aldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
